Hafna „brauðmolum“ og boða ný verkföll
Mótmælin beindust meðal annars gegn hækkandi framfærslukostnaði og frumvarpi um aukna réttarvernd lögreglumanna sem beita skotvopnum. AFP
Frönsk verkalýðsfélög hafa boðað til verkfalla á þriðjudag eftir að hafa hafnað loforði ríkisstjórnarinnar um 0,6 prósenta hækkun lágmarkslauna. Þau segja hækkunina ekki nema „brauðmola“.
Tugir þúsunda gengu út á götur víða um Frakkland í gær, fimmta laugardaginn í röð. Mótmælin beindust meðal annars gegn hækkandi framfærslukostnaði og frumvarpi um aukna réttarvernd lögreglumanna sem beita skotvopnum.
Samkvæmt innanríkisráðuneytinu tóku um 106 þúsund manns þátt um land allt, þar af 24 þúsund í París. Það er minnsta þátttaka síðustu vikna. Samtök námsmanna töldu mótmælendur hins vegar hafa verið 200 þúsund, þar af tæplega 100 þúsund í höfuðborginni.
Fjölmennustu mótmæli síðustu vikna voru á fimmtudag í síðustu viku. Þá tók meira en hálf milljón manna þátt í mótmælum samhliða verkfalli sem verkalýðsfélög stóðu fyrir, samkvæmt opinberum tölum.
Fjöldamótmæli og aðgerðir til að hindra aðgang að framhaldsskólum hafa staðið yfir í rúman mánuð í Frakklandi, öðru stærsta hagkerfi Evrópusambandsins. AFP
Krefjast afsagnar Macrons
Fjöldamótmæli og aðgerðir til að hindra aðgang að framhaldsskólum hafa staðið yfir í rúman mánuð í Frakklandi, öðru stærsta hagkerfi Evrópusambandsins.
Í París klifruðu sumir mótmælendur upp á styttur með franska fána. Meðal þátttakenda voru námsmenn, félagar í verkalýðsfélögum og aðgerðasinnar úr hreyfingu gulvestunga.
„Ekkert réttlæti, enginn friður,“ hrópaði mótmælandi í gjallarhorn.
Aðrir kröfðust afsagnar Emmanuels Macron forseta eða hrópuðu: „Allir hata lögregluna.“ Hópur bar risavaxna brúðu með hatt sem á stóð „Macron lávarður“.
Mótmælin síðustu vikur hafa að mestu farið friðsamlega fram en sums staðar hefur brotist út ofbeldi. Lögreglan hefur jafnframt verið sökuð um harðræði, meðal annars gegn ungum táningum.
Samkvæmt innanríkisráðuneytinu tóku um 106 þúsund manns þátt um land allt, þar af 24 þúsund í París. Það er minnsta þátttaka síðustu vikna. AFP
Segja frumvarpið jafngilda „leyfi til að drepa“
Adrien, tvítugur sellóleikari í hljómsveit sjálfboðaliða sem lék við mótmælin í París, sagði frumvarpið um réttarvernd lögreglumanna vera í brennidepli dagsins.
„Við erum hrædd þegar við komum á mótmæli og verðum enn hræddari ef refsileysi þeirra verður aukið,“ sagði hann. Táragasi hafði verið beitt gegn tónlistarfólki við mótmæli í síðasta mánuði.
Stuðningsmenn frumvarpsins vilja að gengið verði út frá því að lögreglumenn sem beita skotvopnum hafi gert það í neyðarvörn. Þeir segja breytinguna nauðsynlega til að lögreglumenn séu ekki sjálfkrafa grunaðir um óhóflega valdbeitingu.
Meðal stuðningsmanna er flokkur Marine Le Pen, sem tilheyrir ysta hægrinu. Hún er meðal þeirra sem helst eru taldir eiga möguleika á sigri í forsetakosningunum á næsta ári.
Andstæðingar segja breytinguna jafngilda „leyfi til að drepa“. Hún myndi torvelda að rannsóknir hæfust og gera enn erfiðara að draga lögreglumenn til ábyrgðar. Mál vegna meints harðræðis lögreglu rata sjaldan fyrir sakadómstóla í Frakklandi.
„Þau gefa okkur von“
Annars staðar í landinu kröfðust mótmælendur betri námsaðstæðna og aukinna réttinda barna eða sungu fyrir betra Frakkland.
Í Bordeaux í suðvesturhluta landsins söng Josette, 72 ára, mótmælasöng fullum hálsi.
„Börnin mín vildu ekki að ég kæmi,“ sagði hún við AFP-fréttastofuna. „En ég er ungu fólki svo þakklát fyrir að koma þessari hreyfingu af stað.“
„Þau gefa okkur von á tímum þegar okkur finnst við stefna beint í óefni, þegar jörðin heldur áfram að hlýna og öfgahreyfingar til hægri sjá sífellt minni ástæðu til að afsaka málstað sinn.“
内容来自 Mbl.is,版权归原作者所有。
阅读原文 ↗

