„Það er stígandi í landsliðinu okkar“

Sara Rún Hinriksdóttir á landsliðsæfingu.

Sara Rún Hinriksdóttir á landsliðsæfingu. mbl.is/Eyþór

Íslenska kvennalandsliðið í körfubolta leikur í dag gegn Sviss í undankeppni EM. Liðið leikur í A-riðli með Írlandi, Sviss og Aserbaídsjan.

Sara Rún Hinriksdóttir er lykilmaður í íslenska liðinu og var vel stemmd á blaðamannafundi fyrir leikinn.

„Ég held að þetta verði hörkuleikur. Við þurfum að vera ákveðnari og skapa meira flæði í spilinu hjá okkur heldur en við gerðum gegn Írlandi,“ sagði Sara Rún um leikinn.

Þurfa að byrja leikinn af fullum krafti

Íslenska liðið vann fyrsta leik sinn í riðlinum gegn Írlandi á sama tíma og Sviss vann stórsigur á Aserbaídsjan. Það er því líklegt að leikurinn gegn Sviss verði erfiðari.

„Við þurfum að byrja leikinn af meiri krafti og ákveðni en á móti Írlandi. Mér fannst við mun betra liðið í þeim leik en við fórum aldrei í efsta gír á móti þeim sem gerði það að verkum að við slitum þær aldrei alveg frá okkur.“ - sagði hún.

En er það ekki einmitt lykilatriði að byrja leikinn strax af fullum krafti til að lenda ekki í vandræðum með Svisslendinga?

„Mögulega gæti það orðið basl en við erum að spila landsleik og við erum alltaf tilbúnar að gefa allt í þessa leiki og munum gera það. Við þurfum bara að mæta rétt stemmdar og af fullum krafti í leikinn. Þá veit ég að við getum vel unnið Sviss.“

Ánægð með þróunina í landsliðinu

Sara Rún er ánægð með stígandann í íslenska kvennalandsliðinu og er ánægð með þróunina og það að liðið sé að taka næstu skref í þróun kvennalandsliðsins í körfubolta.

„Það eru ótrúlega góðir hlutir að gerast í landsliðinu og ég er mjög ánægð að vera partur af þessari vegferð. Það er ótrúlega góður andi og samheldni í hópnum. Það er stígandi í landsliðinu okkar og ég hvet alla til að koma í Ólafssal og hvetja okkur því við erum með fullt af ungum og frábærum leikmönnum sem eru að stíga upp þegar lykilleikmenn eru meiddir,“ sagði bjartsýn Sara Rún í samtali við mbl.is.

内容来自 mbl.is - Íþróttafréttir,版权归原作者所有。

阅读原文 ↗

把喜欢的内容,留在你的新标签页。

打开我的订阅