Bessent kennir viðskiptaráðuneytinu um
Scott Bessent, fjármálaráðherra Bandaríkjanna, gagnrýndi viðskiptaráðuneyti landsins í dag fyrir að hafa ekki sett singapúrska fyrirtækið Megaspeed á svartan lista vegna viðskipta.
Fyrirtækið er í miðju hneykslismáls sem varð til þess að Jensen Huang lét af störfum sem forstjóri Nvidia í gær.
Í viðtali við CNBC sagði Bessent að fjármálaráðuneytið, varnarmálaráðuneytið, embætti viðskiptafulltrúa Bandaríkjanna og utanríkisráðuneytið hefðu „mánuðum saman“ stutt að Megaspeed yrði sett á listann.
„En það er viðskiptaráðuneytið sem heldur á pennanum,“ sagði Bessent og bætti við að beina yrði spurningum um innri málsmeðferð ráðuneytisins þangað.
Óvenjulegt er að bandarískur ráðherra gagnrýni annað ráðuneyti með svo opinberum hætti. Howard Lutnick fer fyrir viðskiptaráðuneytinu.
Segir Kínverja fá forskot
Bessent sagðist ósáttur við stöðuna. Donald Trump Bandaríkjaforseti hefði tekið skýrt fram að Kína ætti ekki að fá Nvidia-flögur sem væru öflugri en H100-gerðin.
Hann sagði það mjög svekkjandi þegar flögur kæmust til óheimilla viðtakenda. Það skaðaði bandarísk fyrirtæki og veitti Kínverjum forskot í kapphlaupinu um gervigreind.
Grunur leikur á að Megaspeed hafi hjálpað kínverskum fyrirtækjum að komast hjá bandarískum útflutningshöftum með því að kaupa Nvidia-flögur fyrir gagnaver sín í Suðaustur-Asíu og senda þær síðan áfram til Kína.
Samkvæmt fréttum námu viðskipti fyrirtækisins með Nvidia-flögur meira en fjórum milljörðum Bandaríkjadala á tveimur árum. Það samsvarar rúmlega 493 milljörðum króna miðað við síðasta skráða viðmiðunargengi Seðlabanka Íslands, frá 12. nóvember.
Fyrirtækið er í miðju hneykslismáls sem varð til þess að Jensen Huang lét af störfum sem forstjóri Nvidia í gær. AFP
Viðurkenndi framhjáhald
Bandarískir fjölmiðlar greindu frá því í vikunni að Alice Huang, fyrrverandi stjórnandi hjá Megaspeed, væri grunuð um að hafa starfað í þágu kínverskrar leyniþjónustu. Jafnframt kom fram að hún hefði átt í sambandi við Jensen Huang. Þau eru ekki skyld.
Kínversk stjórnvöld hafa hafnað ásökunum um njósnir.
Jensen Huang viðurkenndi framhjáhald í bréfi til starfsfólks Nvidia 8. nóvember en nafngreindi ekki konuna sem hann hafði átt í sambandi við. Hann sagði af sér í gær.
Stjórn Nvidia hefur tilkynnt að hún muni rannsaka málið. Þá hafa formenn þriggja nefnda Bandaríkjaþings óskað eftir að Huang mæti á lokaðan upplýsingafund 18. nóvember.
Vill að sjónum sé beint að viðskiptunum
Bessent sagði umfjöllunina hingað til hafa beinst um of að einkalífi Huangs.
„Hingað til hefur umfjöllunin snúist um persónulega bresti Jensens Huangs,“ sagði hann.
Aðalatriðið væri hins vegar hvort Nvidia hefði vitað hverjir viðskiptavinir fyrirtækisins væru og hvort það hefði gert öflugar ráðstafanir til að tryggja að flögur kæmust ekki til óheimilla viðtakenda.
Hann velti því upp hvort Nvidia hefði selt flögur til skúffufélaga sem væru augljóslega aðeins milliliðir. Mikilvægt væri að þeir innan fyrirtækisins sem bæru ábyrgð á slíku yrðu látnir axla hana.
Bessent sagði mikið um að útflutningshöftin væru sniðgengin og að stjórnvöld ynnu stöðugt að því að koma í veg fyrir það.
内容来自 Mbl.is - Erlendar fréttir,版权归原作者所有。
阅读原文 ↗
