Sigurður Gunnar ráðinn framkvæmdastjóri
Sigurður Gunnar Gissurarson hefur verið ráðinn framkvæmdastjóri viðskiptalausna Advania. Hann kemur frá Emblu Medical, áður Össuri, þar sem hann hefur gegnt stjórnunarstörfum síðastliðin 20 ár.
Þetta kemur fram í tilkynningu frá Advania. Sigurður hefur sinnt stjórnunarstörfum á sviði sölu, markaðsmála, vörustýringar og rekstrar hjá Emblu Medical, bæði á Íslandi og í Bandaríkjunum.
Áður starfaði hann hjá Tæknivali, fyrst sem viðskiptastjóri og síðar sem forstöðumaður tækniþjónustu. Þar leiddi hann teymi sem þjónustuðu fyrirtæki á sviði upplýsingatækni og fjarskipta.
Sigurður er með BSc-gráðu í tæknifræði og meistaragráðu í alþjóðlegri stjórnun frá Syddansk Universitet í Danmörku.
Sjá tækifæri í nýtingu gervigreindar
Hildur Einarsdóttir, forstjóri Advania á Íslandi, segir í tilkynningunni að mikil tækifæri felist fyrir íslensk fyrirtæki og stofnanir í aukinni nýtingu gervigreindar í rekstri og lykilkerfum þeirra. Reynsla Sigurðar og viðskiptaleg sýn muni hjálpa viðskiptavinum félagsins að nýta þau tækifæri.
„Viðskiptalausnir byggja á einstaklega öflugu og framsæknu teymi sem vinnur náið með okkar viðskiptavinum að lausnum sem henta þeirra viðskiptaumhverfi og þörfum,“ segir Hildur.
Auk Hildar og Sigurðar sitja í framkvæmdastjórn Advania þau Auður Inga Einarsdóttir, framkvæmdastjóri innviðalausna, Erna Björk Sigurgeirsdóttir, framkvæmdastjóri fjármála, mannauðs og samskipta, Hafsteinn Guðmundsson, framkvæmdastjóri rekstrarlausna, og Sigrún Ámundadóttir, framkvæmdastjóri hugbúnaðarlausna.
内容来自 mbl.is - Viðskiptafréttir,版权归原作者所有。
阅读原文 ↗