Atli Steinn starfaði sem strippari á háskólaárunum
Blaðamaðurinn Atli Steinn Guðmundsson hefur lifað ævintýralegu lífi. Sumarið 1999 hélt hann ásamt vini sínum til Austurríkis þar sem þeir réðu sig til starfa á nektardansstað. Atli Steinn rifjaði upp þetta óvenjulega tímabil í hlaðvarpinu Marta María býður heim.
Á þessum tíma hafði hann starfað sem dyravörður á skemmtistöðum í Reykjavík og tekið þátt í kvennakvöldum þar sem hann steig á svið. Hann og vinur hans ákváðu síðan að ganga skrefinu lengra og sækja um starf á nektardansstað í Vínarborg.
„Við ákváðum að taka aðeins lengra og sóttum um starf á strippstað í Vín í Austurríki,“ sagði Atli Steinn.
Óttuðust að hafa tekið ranga ákvörðun
Þeir héldu utan 27. maí 1999 og var tekið á móti þeim á flugvellinum. Þegar þeir áttuðu sig á umfangi starfseminnar fóru að renna á þá tvær grímur.
Atli Steinn rifjaði upp að hann hefði velt því fyrir sér hvort hann hefði átt að halda áfram í fyrra starfi sínu hjá Securitas í stað þess að leggja í þetta ævintýri.
En sumarið reyndist eftirminnilegt.
Þeir dvöldu í sjö vikur í Vínarborg áður en þeir héldu til München og þaðan til Hamborgar, þar sem þeir komu meðal annars fram á skemmtistað fyrir samkynhneigða karlmenn.
Missti tólf kíló
Starfið var þó enginn dans á rósum. Atli Steinn lýsti löngum vinnudögum og mikilli áfengisdrykkju sem fylgdi starfinu.
Þegar hann sneri aftur til Íslands í ágúst hafði hann misst tólf kíló.
Þrátt fyrir álagið segist hann ekki sjá eftir reynslunni. Honum þótti sérstaklega áhugavert að kynnast fólki úr ólíkum áttum og fá innsýn í líf þeirra sem störfuðu í nektardansi.
„Þetta var mjög skemmtilegur tími, sumarið '99, alveg dásamlegur,“ sagði Atli Steinn.
Hann viðurkenndi þó að það hefði reynst erfitt að setjast aftur á skólabekk í Háskóla Íslands eftir þetta viðburðaríka sumar.
Hægt er að hlusta á þáttinn á helstu streymisveitum og á hlaðvarpsvef mbl.is.
内容来自 Mbl.is,版权归原作者所有。
阅读原文 ↗/frimg/1/48/14/1481474.jpg)