Segir byssumanninn hafa átt í deilum við húsfélag

Jeffery Carroll, starfandi lögreglustjóri borgarinnar, ræddi við fréttamenn.

Jeffery Carroll, starfandi lögreglustjóri borgarinnar, ræddi við fréttamenn. AFP

Maðurinn sem er grunaður um að hafa orðið einum að bana og sært fjóra í skotárás í miðborg Washington í Bandaríkjunum í dag virðist hafa átt í deilum við húsfélag fjölbýlishúss í hverfinu.

Þetta sagði Jeffery Carroll, starfandi lögreglustjóri borgarinnar, við fréttamenn.

Að sögn Carroll fannst maðurinn með skotsár sem hann hafði sjálfur veitt sér eftir að hafa lokað sig af í íbúð sinni skammt frá vettvangi. Ekki lá strax fyrir hvert ástand hans væri. Nafn hans hefur ekki verið gefið upp.

Muriel Bowser, borgarstjóri Washington, ræddi einni við fréttamenn á vettvangi í dag. AFP

Skotinn inni í líkamsræktarstöð

Árásin átti sér stað inni í og utan við líkamsræktarstöð í Logan Circle-hverfinu, um 1,6 kílómetrum norðan við Hvíta húsið.

Carroll sagði að sá sem lést hefði verið skotinn inni í líkamsræktarstöðinni. Einn hinna fjögurra særðu væri í lífshættu en áverkar hinna þriggja virtust ekki lífshættulegir.

Lögreglustjórinn sagði hinn grunaða að því er virtist hafa átt í „einhvers konar deilum“ við húsfélag fjölbýlishússins. Ekki kom nánar fram í hverju þær hefðu falist.

Mikill viðbúnaður var vegna árásarinnar, sem varð á háannatíma morgunumferðarinnar.

Mikill viðbúnaður var vegna árásarinnar, sem varð á háannatíma morgunumferðarinnar. AFP

Mikill viðbúnaður

Mikill viðbúnaður var vegna árásarinnar, sem varð á háannatíma morgunumferðarinnar. Tugir bifreiða frá ýmsum löggæslustofnunum sáust aka á vettvang og lögregluþyrlur sveimuðu yfir svæðinu. Lögregla flutti suma íbúa á brott en öðrum var sagt að halda kyrru fyrir þar sem þeir voru.

Michael Carney, viðskiptavinur líkamsræktarstöðvarinnar VIDA Fitness, sagði við The Washington Sun að hann hefði verið á hlaupabretti þegar skotárásin hófst. Hann hefði heyrt hvell og síðan séð manneskju á gólfinu sem hafði verið skotin í höfuðið.

„Allir voru eiginlega bara að fela sig á bak við blómaker og annað slíkt,“ sagði Carney við blaðið.

内容来自 Mbl.is,版权归原作者所有。

阅读原文 ↗

把喜欢的内容,留在你的新标签页。

打开我的订阅