Pútín segir erlent herlið í Úkraínu þýða „framhald stríðsins“

Vladimír Pútín Rússlandsforseti fundar með bandarískum sendimönnum í Moskvu í dag. Með honum er Júrí Úsjakov, ráðgjafi rússneskra stjórnvalda í utanríkismálum. Sendimennirnir, Jared Kushner, tengdasonur Donalds Trumps Bandaríkjaforseta, og kaupsýslumaðurinn Steve Witkoff, komu til fundarins að loknum viðræðum í Abú Dabí um stríðið í Úkraínu. AFP

Vladimír Pútín Rússlandsforseti sagði í dag að vera erlends herliðs í Úkraínu myndi fela í sér „framhald stríðsins“.

Hann lagði jafnframt til mannúðaraðgerðir í bænum Kostjantínivka í austurhluta landsins, þar sem hann segir hundruð almennra borgara enn dvelja.

Volodimír Selenskí Úkraínuforseti hvatti á sama tíma Evrópuríki til að fylgjast grannt með viðræðum Bandaríkjanna og Rússlands um nýtt fyrirkomulag öryggismála í Evrópu.

Segir 400 til 500 borgara enn í bænum

Pútín ræddi tillögu sína að mannúðaraðgerð á fundi með bandarískum sendimönnum í Moskvu. Rússnesk stjórnvöld sögðust hafa náð Kostjantínivka á sitt vald í júlí.

„Þar eru enn um 400 til 500 almennir borgarar,“ sagði Pútín.

Hann lagði til að farið yrði að með sama hætti og í Oleskí, bæ sem Rússar ráða yfir. Vopnahlé sem Bandaríkjamenn höfðu milligöngu um í síðasta mánuði gerði hundruðum almennra borgara, sem höfðu verið þar innlyksa, kleift að yfirgefa bæinn.

Evrópa þurfi að fylgjast grannt með

Selenskí ávarpaði evrópska leiðtoga á leiðtogafundi í Dyflinni í dag. Hann hvatti Evrópuríki til að vera á varðbergi gagnvart viðræðum Bandaríkjanna og Rússlands um nýja öryggisskipan í álfunni.

„Við bíðum frekari upplýsinga og Evrópa þarf að fylgjast grannt með,“ sagði Selenskí.

内容来自 Mbl.is,版权归原作者所有。

阅读原文 ↗

把喜欢的内容,留在你的新标签页。

打开我的订阅