Christopher Nolan á Íslandi

Kvikmyndaleikstjórinn Christopher Nolan vakti mikla lukku hjá aðdáanda sem rakst á hann í Reykjavík. Samsett mynd/Skjáskot/Instagram

Ljósmyndarinn og efnishöfundurinn Alex Michael Green Svansson átti erfitt með að halda ró sinni þegar kvikmyndaleikstjórinn Christopher Nolan gekk fram hjá honum í Reykjavík.

Alex, sem er þekktur undir nafninu Alex from Iceland, greinir frá kynnum sínum af leikstjóranum í færslu á Instagram.

Hann greinir frá því að Nolan hafi gengið fram hjá honum í Reykjavík og leynir ekki gleði sinni yfir því að hafa rekist á uppáhaldsleikstjóra sinn.

Myndskeiðið hefur vakið mikla athygli en þegar þetta er skrifað hafa ríflega 17 þúsund manns líkað við það.

Skrúfaði niður rúðuna og kallaði

„Ég endaði á að fara á taugum, skrúfa niður rúðuna og kalla til hans: Ég er mikill aðdáandi! Hann leit á mig og sagði: takk, takk,“ segir Alex á ensku í myndskeiðinu.

Í texta við færsluna gerir hann góðlátlegt grín að eigin viðbrögðum.

„Ég: Alveg rólegur í kringum frægt fólk. Líka ég, þegar Christopher Nolan gengur fram hjá mér í Reykjavík,“ skrifar Alex.

„Hann hefur verið uppáhaldsleikstjórinn minn frá því ég man eftir mér. Að segja að þetta hafi verið óraunverulegt nær ekki einu sinni utan um það.“

Christopher Nolan á viðburði árið 2023.

Christopher Nolan á viðburði árið 2023. AFP/Valerie Macon

Kunnugur Íslandi

Nolan er meðal þekktustu kvikmyndaleikstjóra samtímans og á meðal annars að baki myndirnar Inception, Interstellar og Oppenheimer, auk Batman-þríleiksins með Christian Bale í aðalhlutverki.

Ísland er honum ekki framandi enda hafa tökur á myndum hans, þar á meðal Interstellar og The Odyssey, farið fram hér á landi.

内容来自 Mbl.is - Fólkið - Fólk,版权归原作者所有。

阅读原文 ↗

把喜欢的内容,留在你的新标签页。

打开我的订阅