Colom hafði betur í Mississippi
Fjölmiðlar vestanhafs greindu frá því nú fyrir stundu að demókratinn Scott Colom hefði haft betur í öldungadeildarkosningunum í Mississippi gegn sitjandi þingmanni repúblikana, Cindy Hyde-Smith.
Mjög mjótt var á munum á kosninganótt í ríkinu, og var Colom á einum tíma með einungis um 30 atkvæða forskot á Hyde-Smith.
Talning á utankjörfundaratkvæðum og svonefndum vafaatkvæðum, þar sem kjósendur fá tækifæri til þess að bæta úr mögulegum annmörkum á kjörseðli sínum, hefur hins vegar haldið áfram síðan, og hefur forskot Coloms vaxið jafnt og þétt eftir því sem talningunni hefur undið fram.
Í nýjustu atkvæðatölum er Colom með 473.336 atkvæði, en Hyde-Smith með 468.667 og munar því einungis 4.669 atkvæðum á milli þeirra.
Hins vegar er talið að miðað við þau atkvæði sem enn á eftir að telja, sem og úr hvaða kjördæmum ríkinsins þau atkvæði koma eigi Hyde-Smith ekki lengur fræðilegan möguleika á því að vinna upp forskot Coloms.
Sá fyrsti frá lokum borgarastríðsins
Colom er saksóknari í Mississippi-ríki. Hann verður nú fyrsti demókratinn frá árinu 1982 til að vinna öldungadeildarkosningar í ríkinu.
Þá er hann jafnframt fyrsti blökkumaðurinn frá árinu 1874 til þess að verða öldungadeildarþingmaður ríkisins, en það ár var repúblikaninn Blanche Bruce kjörinn af ríkisþingi Mississippi til að gegna embættinu á „endurreisnarárunum“ eftir borgarastríðið.
Mississippi er jafnframt áttunda ríkið, þar sem demókratar náðu að hirða öldungadeildarþingsætið af repúblikönum, en þar á meðal voru lykilvígi repúblikana á borð við Texas, Kansas og Iowa.
Demókratar hafa því nú 55 þingsæti af 100 í öldungadeildinni. Enn á eftir að ljúka talningu í Alaska-ríki, en þar er demókratinn Mary Peltola með nauma forystu á frambjóðanda repúblikana og sitjandi þingmann, Dan S. Sullivan.
Auglýsingin vakti athygli
Colom hefur sagt í viðtölum að ekki margir hafi haft trú á að hann gæti unnið ríkið, og gagnrýndi hann um daginn nokkur af skoðanakannanafyrirtækjum Bandaríkjanna, sem höfðu afskrifað hann.
Ein af kosningaauglýsingum hans hefur hins vegar vakið athygli út fyrir mörk ríkisins í Bandaríkjunum, en þar gagnrýndi hann ummæli Hyde-Smith, sem hafði hvatt kjósendur sína til þess að velja sér ódýrari prótíngjafa í ljósi mikillar verðbólgu.
„Velja annað prótín? Hún hefur misst vitið,“ segir einn leikarinn í auglýsingunni. „Ég myndi frekar velja mér annan öldung“. Í ummælum við myndbandið á YouTube segir einn að þetta sé auglýsingin sem hafi unnið kosningarnar fyrir Colom.
内容来自 Mbl.is,版权归原作者所有。
阅读原文 ↗