Valur afgreiddi ÍR í seinni hálfleik
Valur vann góðan sigur á ÍR, 24:17, í úrvalsdeild kvenna í handbolta á Hlíðarenda í kvöld. Valur er með 14 stig, tveimur stigum minna en topplið Hauka. ÍR er í 5. sæti með 9 stig.
Gestirnir úr Breiðholti byrjuðu betur, skoruðu fyrstu þrjú mörk leiksins og höfðu frumkvæðið í upphafi. Valur náði góðum kafla um miðbik fyrri hálfleiks, skoraði fimm mörk í röð og breytti stöðunni úr 7:3 í 8:7 sér í vil.
ÍR var öflugra á lokakafla fyrri hálfleiks og fór með þriggja marka forskot inn í hálfleik, 12:9.
Einstefna í síðari hálfleik
Valskonur voru fljótar að snúa leiknum sér í vil í síðari hálfleik og komust yfir, 14:13. Þær skoruðu síðan fjögur mörk í röð og breyttu stöðunni úr 14:14 í 18:14 áður en þær tryggðu sér sjö marka sigur.
Valur vann síðari hálfleikinn 15:5 og var þetta sjötti sigur liðsins í röð.
Ásdís Þóra Ágústsdóttir var markahæst hjá Val með fimm mörk og Arna Karitas Eiríksdóttir skoraði fjögur. Landsliðsmarkvörðurinn Hafdís Renötudóttir átti stórleik í marki Vals og varði 15 skot.
Sara Dögg Hjaltadóttir var markahæst hjá ÍR með fimm mörk og Sylvía Sigríður Jónsdóttir skoraði fjögur.
内容来自 Mbl.is - Íþróttir - Handbolti,版权归原作者所有。
阅读原文 ↗