Jenner fækkar fötum fyrir tekíla
Bandaríska raunveruleikastjarnan, fyrirsætan og viðskiptakonan Kendall Jenner, sem skaust upp á stjörnuhimininn sem hluti af hinni heimsfrægu Kardashian-fjölskyldu, fór úr fötunum fyrir nýjustu auglýsingaherferð tekílamerkisins 818, sem hún stofnaði árið 2021. Í auglýsingunni sést Jenner, 31 árs, rölta um engi á evuklæðunum.
Herferðin ber heitið Nothing Extra, sem þýða má sem „ekkert auka“, og á nektin að undirstrika að engin óþörf efni séu í tekílanu. Samkvæmt kynningu herferðarinnar eru innihaldsefnin aðeins þrjú: blár agavi, vatn og ger.
Jenner gengur meðal annars um með körfu fulla af plöntum í fanginu og á milli þeirra glittir í tekílaflöskur. Hún tínir blóm og röltir um í umhverfi sem minnir einna helst á aldingarðinn Eden. Einnig sést hún hella tekíla í glas og fá sér sopa.
Í auglýsingunni er leikið með hugmyndina um nekt, bæði Jenners og tekílans, sem er sagt án viðbættra bragð- og sætuefna. Þegar sögumaðurinn lýsir tekílanu sem „nánast nöktu“ og ætlar að segja það sama um Jenner grípur hún fram í: „Alls ekki nakin.“ Þá birtist hún í hvítum sumarkjól með tekílaglas í hendi.
Auglýsingin var birt á YouTube fyrir tveimur dögum og hefur þegar fengið hátt í 25 þúsund áhorf. Jenner deildi henni einnig með 277 milljónum fylgjenda sinna á Instagram, þar sem fjölmargir hafa ritað athugasemdir.
内容来自 Mbl.is - Matur,版权归原作者所有。
阅读原文 ↗