Tvíhöfðabarn á leiðinni
Tvíhöfðabarn væntanlegt. Sigurjón Kjartansson og Jón Gnarr árituðu sónarmyndina fyrir spenntan aðdáenda. Ljósmynd/Aðsend
Sigurjón Kjartansson og Jón Gnarr árituðu fleira en afmælisvarning þegar þeir buðu áskrifendum hlaðvarpsins Tvíhöfða til fagnaðar á veitingastaðnum Mossley á Kársnesi.
Einn dyggur aðdáandi mætti með sónarmynd og fékk þá félaga til að árita hana. Það má því segja að sannkallað Tvíhöfðabarn sé á leiðinni í heiminn.
Á annað hundrað manns mættu til að fagna með tvíeykinu, sem heldur upp á þrjátíu ára afmæli Tvíhöfða í ár. Gestir spjölluðu við þá félaga og Pétur Magnússon, formann FHT, og nældu sér í afmælisvarning sem var til sölu í takmörkuðu upplagi. Fjölmargar vörur seldust upp og er meira í framleiðslu.
Þeir Sigurjón og Jón hafa í þrjá áratugi skemmt landsmönnum með húmor, þjóðfélagsrýni og skrautlegum persónum. Afmælisfögnuðurinn heldur áfram hinn 27. nóvember þegar þeir stíga á svið í Eldborg í Hörpu með sýninguna „30 ára brúðkaupsafmæli Tvíhöfða“.
Uppselt er á sýninguna klukkan 21 en aukasýningu hefur verið bætt við klukkan 18 sama dag. Meðal gesta verða Valdimar, Gugga í Gúmmíbát, Suðu Sigfús og Adrian Nigelson.
Ragnheiður Oddlaugardóttir, Jóga Gnarr og Margrét Lilja Guðmundsdóttir sáu um sölu á varning. Ljósmynd/Aðsend
内容来自 Mbl.is - Smartland,版权归原作者所有。
阅读原文 ↗














