Gular viðvaranir vegna hvassviðris eða storms
Gular viðvaranir hafa verið gefnar út á Austfjörðum og Suðausturlandi vegna norðan hvassviðris eða storms.
Á Austfjörðum tók viðvörunin gildi klukkan 5 í morgun en á Suðausturlandi tekur hún gildi klukkan 9.
Þar verða norðvestan 15-23 metrar á sekúndu og vindhviður staðbundið yfir 35 m/s. Varasamt ferðaveður, einkum fyrir ökutæki sem taka á sig mikinn vind. Fram kemur í athugasemd veðurfræðings hjá Veðurstofu Íslands að hvassir norðvestan vindstrengir verði á Austfjörðum undir Vatnajökli í dag.
Veðurspáin fyrir landið er annars þannig að spáð er norðvestan 13-23 m/s austanlands í dag, annars verður mun hægari vindur. Dálítil él verða norðaustantil, en lengst af léttskýjað á Suður- og Vesturlandi. Frost verður á bilinu 0 til 7 stig. Dregur úr vindi í kvöld.
Suðvestan 5-13 m/s og fer að snjóa á morgun, en slydda eða rigning á láglendi síðdegis og hiti 0 til 5 stig. Hægari vindur á austanverðu landinu, þurrt og kalt, en dálítil snjókoma seint á morgun.
内容来自 Mbl.is,版权归原作者所有。
阅读原文 ↗