Villa olli töfum í greiðslumiðlun hérlendis
Reiknistofa bankanna er mikilvægt innviðafyrirtæki í fjármálaþjónustu hér á landi. mbl.is/Eggert Jóhannesson
Hnökrar urðu í viðhaldsaðgerðum hjá Reiknistofu bankanna sem olli því að tafir urðu á greiðslumiðlun hérlendis.
Þetta staðfestir Ragnhildur Geirsdóttir, forstjóri Reiknistofu bankanna, í samtali við mbl.is. Villumeldingar komu meðal annars upp í heimabönkum.
Allir lögðust á eitt
Í heimabanka Landsbankans sagði að tafir væru á að staðfesting á að greiðslur bærust og voru viðskiptavinir bankans beðnir um að endurtaka ekki millifærslur eða greiðslur reikninga á meðan á þessu stóð.
Villan gerði vart við sig í um hálftíma samkvæmt Ragnhildi og var allt komið í réttar horfur upp úr klukkan tvö í dag. Þá bætir hún við að allir hafi lagst á eitt við að koma þessu í lag.
„Þetta var regluleg viðhaldsaðgerð sem fór ekki eins vel og hún átti að gera og olli truflun í greiðslumiðlun og greiðslukröfum,“ segir hún.
Þá bætir hún við að vandamálið hafi einskorðast við Reiknistofuna og ekki væri um utanaðkomandi áhrif að ræða á starfsemi Reiknistofunnar.
内容来自 Mbl.is,版权归原作者所有。
阅读原文 ↗

