Tuttugu létust á leið til Krítar
Krít er orðin ein helsta komuleið farandfólks inn í Evrópusambandið. Fólkið leggur af stað frá Líbíu og reynir að komast sjóleiðina til Grikklands. Ljósmynd/Colourbox
Tuttugu manns létust um helgina þegar þeir reyndu að komast sjóleiðina til grísku eyjunnar Krítar, að sögn yfirvalda í Grikklandi. Eyjan er orðin einn helsti áfangastaður farandfólks á leið til Evrópusambandsins.
Gríska strandgæslan greindi frá því í dag að átta manns hefðu fundist látnir í tengslum við björgunaraðgerð vegna eins báts og tólf um borð í öðrum. Rúmlega 40 manns var bjargað úr bátunum tveimur.
Sjö lík fundust um borð
Lögregla hóf neyðarbjörgunaraðgerð seint á laugardag eftir að neyðarboð bárust frá báti. Hvassviðri olli erfiðum aðstæðum á sjó, að sögn strandgæslunnar.
Yfirvöld greindu frá því í gær að um 28 manns hefði verið bjargað um borð í annan bát sem átti leið hjá. Eitt lík var einnig tekið um borð. Allt fólkið var frá Súdan. Þeir sem komust lífs af voru síðan fluttir ásamt líkinu yfir í lögregluskip og þaðan til Krítar.
Strandgæslan fann bátinn sem fólkið hafði verið í nótt. Um borð voru sjö lík til viðbótar.
Í öðru tilviki fundust tólf lík um borð í báti sunnan við Krít á mánudag. Átján manns var bjargað úr þeim báti, að sögn strandgæslunnar.
Hættuleg sigling frá Líbíu
Krít er orðin ein helsta komuleið farandfólks inn í Evrópusambandið. Fólkið leggur af stað frá Líbíu og reynir að komast sjóleiðina til Grikklands.
Oft verður manntjón í þessum ferðum þegar bátarnir sökkva eða lenda í vandræðum á leiðinni.
内容来自 Mbl.is - Erlendar fréttir,版权归原作者所有。
阅读原文 ↗