Ákærður fyrir vörslu barnaníðsefnis eftir komuna frá Íslandi
Ekki kemur fram í tilkynningunni hvers vegna hann hafði verið á Íslandi eða hversu lengi hann dvaldi hér á landi. mbl.is/Hari
Þrítugur bandarískur karlmaður var handtekinn á alþjóðaflugvellinum í Portland í Oregon eftir að tollverðir fundu meint barnaníðsefni í síma hans.
Maðurinn var að koma með flugi frá Íslandi.
Þetta kemur fram í tilkynningu frá alríkissaksóknaraembættinu í Oregon, sem greindi frá því í dag að maðurinn, Alec Joseph Adams, hefði verið ákærður fyrir vörslu barnaníðsefnis.
Á yfir höfði sér allt að 20 ára fangelsi
Við tollskoðun eftir lendingu í Portland 28. október kom í ljós að Adams var á skilorði vegna fyrri dóma fyrir að hafa lokkað til sín barn og framið kynferðisbrot gegn barni á netinu.
Við skoðun á síma hans fundu tollverðir myndefni sem grunur lék á að sýndi kynferðislegt ofbeldi gegn börnum. Rannsóknarlögreglumenn fundu í kjölfarið fleiri myndir og myndskeið í falinni möppu í símanum.
Adams á yfir höfði sér allt að 20 ára fangelsi verði hann fundinn sekur. Ekki kemur fram í tilkynningunni hvers vegna hann hafði verið á Íslandi eða hversu lengi hann dvaldi hér á landi.
内容来自 Mbl.is,版权归原作者所有。
阅读原文 ↗