Munar tæpum 100 atkvæðum í Mississippi

Scott Colom frambjóðandi Demókrata.

Scott Colom frambjóðandi Demókrata. AFP/Rogelio V. Solis

Demókratinn Scott Colom og repúblikaninn Cindy Hyde-Smith heyja hnífjafna baráttu um sæti í öldungadeild Bandaríkjaþings fyrir Mississippi-ríki. Frambjóðandi á vegum Demókrataflokksins í ríkinu hefur ekki náð kjöri í öldungadeildinni í meira en 40 ár. 

Þegar 96% voru talin í morgun var Colom með 65 atkvæða forskot, en enn á eftir að telja um 50.000 atkvæðaseðla.

Hyde-Smith gegnir nú embætti öldungadeildarþingmans ríkisins, en hún er fyrsta konan sem situr á Bandaríkjaþingi fyrir Mississippi. Hún var fyrst kjörin árið 2018 og nýtur stuðnings Donalds Trump forseta sem sigraði kosningar í ríkinu með meira en 22 prósentustiga mun árið 2024.

Ef Colom sigrar verður hann fyrsti svarti öldungadeildarþingmaðurinn sem kjörinn er í Mississippi síðan 1875.

Áður en kosningabaráttan fyrir þingkosningarnar fór af stað bjuggust fáir við að demókratar ættu raunhæfan möguleika á að ná öldungadeildarsæti í Mississippi en flokkurinn hefur veitt auknu fjármagni í baráttuna í ríkinu undanfarnar vikur, þar sem hann sá óvænt tækifæri til að ná sætinu.

Hafði forystu framan af 

Hyde-Smith hafði forystu þegar um 30% atkvæða höfðu verið talin, en eftir því sem fleiri atkvæðaseðlar voru taldir náði Colom naumu forskoti á andstæðing sinn.

Í Mississippi er ekki sjálfkrafa endurtalið þegar mjótt er á munum og frambjóðendur geta ekki heldur farið fram á endurtalningu.

Í ríkinu eru utankjörfundaratkvæði sem send eru í pósti einnig talin ef þau eru póstlögð í síðasta lagi á kjördag og berast innan fimm virkra daga þar á eftir.

Það þýðir að úrslit liggja að öllum líkindum ekki fyrir fyrr en í fyrsta lagi 10. nóvember, að sögn Julie Wronski, dósents í stjórnmálafræði við Háskólann í Mississippi. í samtali við BBC.

„Vegna þess hve mjótt er á munum milli frambjóðendanna tveggja þurfum við í raun að bíða þar til hvert einasta atkvæði sem berst, með hvaða hætti sem er, hefur verið talið,“ sagði Wronski.

Metnaðarlaus barátta 

Wronski sagði að Hyde-Smith, sem var skipuð í embættið árið 2018, hefði að mestu háð daufa kosningabaráttu og treyst á að traustur íhaldssamur kjósendahópur ríkisins skilaði sínu.

„Það var mjög áberandi hve sjaldan hún kom fram opinberlega,“ sagði Wronski.

Trump tók þátt í kosningabaráttunni með Hyde-Smith í síðasta mánuði og sagðist vera þar „af því að Cindy stendur sig frábærlega, en ég þarf bara að vera viss. Ég get ekki tekið neina áhættu“.

Cindy Hyde-Smith og Trump.

Cindy Hyde-Smith og Trump. AFP

Tapið stórt árið 2020

Colom sagði við Washington Post í október að demókrötum hefði yfirleitt ekki gengið vel í Mississippi vegna þess að stórsigrar repúblikana undanfarin ár hefðu orðið til þess að þeir beindu fjármunum sínum annað.

Árið 2020 fylktu demókratar í fylkinu sér að baki Mike Espy, fyrrverandi landbúnaðarráðherra Bandaríkjanna, sem þeir töldu hafa meðbyr, en hann tapaði fyrir Hyde-Smith með miklum mun.

Demókratar á landsvísu eru „vanir því að láta sig Mississippi engu varða“, sagði Colom. „Að mínu mati getur flokkur ekki sagst bera hag vinnandi fólks fyrir brjósti ef honum stendur á sama um vinnandi fólk í dreifbýli Mississippi sem á í erfiðleikum.“

内容来自 Mbl.is - Erlendar fréttir,版权归原作者所有。

阅读原文 ↗

把喜欢的内容,留在你的新标签页。

打开我的订阅