Hrósar demókrötum og viðurkennir áhrif stríðsins

Flokkur forsetans tapaði völdum í báðum deildum þingsins í nótt.

Flokkur forsetans tapaði völdum í báðum deildum þingsins í nótt. AFP

Donald Trump Bandaríkjaforseti segir stríðið gegn Íran eiga þátt í miklum ósigri repúblikana í þingkosningunum. Hann ver þó ákvörðun sína um hernaðinn og telur kjósendur skilja mikilvægi hans.

„Ég held að Íran hafi átt þátt í þessu, en um leið skildi fólk mikilvægi þess sem ég hef gert gagnvart Íran,“ sagði Trump í símaviðtali við Fox News nú fyrir stundu.

Þá hrósaði hann demókrötum, andstæðingum sínum, í óvenju jákvæðum tón eftir stórsigur þeirra á repúblikönum í þingkosningunum.

„Mér finnst demókratar hafa staðið sig vel. Það finnst mér í alvöru. Mér finnst þeir hafa staðið sig vel. Þeir börðust af hörku,“ sagði Trump við Fox News.

Bætti hann við að „stemning hafi legið í loftinu“ og að hann „ætti ekki að hafa samviskubit“.

Hannity telur stríðið hafa ráðið miklu

Hækkandi framfærslukostnaður og stríðið gegn Íran voru meðal helstu mála kosningabaráttunnar. Áhrif stríðsins á úrslitin voru einnig til umræðu meðal stuðningsmanna forsetans í nótt.

Á kosningavöku Fox News spurði fréttaþulurinn Bret Baier þáttastjórnandann Sean Hannity hvort úrslitin hefðu orðið önnur ef ekki hefði komið til stríðsins.

Hannity svaraði því játandi og bætti við: „Hundrað prósent.“

Stríðið hefur haft áhrif á útgjöld bandarískra heimila. Hærra eldsneytisverð hefur aukið kostnað við samgöngur og vöruflutninga og verðhækkanir á áburði hafa komið illa við bændur. Áhrifanna hefur því gætt langt út fyrir bensínstöðvarnar.

Í ríkjum á borð við Iowa hafa frambjóðendur demókrata lagt áherslu á þennan kostnað, samhliða gagnrýni á tollastefnu forsetans. Þar hefur demókratinn Josh Turek unnið öldungadeildarsæti af repúblikönum.

Gerði lítið úr stríðinu fyrir kjördag

Kvöldið fyrir kosningarnar dró Trump úr umfangi átaka Bandaríkjanna og Írans í viðtali við Hannity á Fox News.

Hann sagði Bandaríkin geta bundið enda á átökin hvenær sem væri og kvaðst frekar vilja ná samkomulagi til að bjarga mannslífum.

Forsetinn hefur jafnframt haldið því fram í nótt að repúblikanar hefðu unnið stórsigur ef hann hefði sjálfur verið í framboði. Í samtali við New York Times segist hann þó reiðubúinn að sætta sig við úrslitin og vinna með demókrötum.

内容来自 Mbl.is - Erlendar fréttir,版权归原作者所有。

阅读原文 ↗

把喜欢的内容,留在你的新标签页。

打开我的订阅