Segir ásakanirnar ekki eiga við rök að styðjast

Gagnaver Borealis Data Centers á Blönduósi.

Gagnaver Borealis Data Centers á Blönduósi. mbl.is/Eyþór

Yfirlögfræðingur Borealis Data Center segir ásakanir félags sem hefur stefnt Borealis fyrir um 900 milljónir króna ekki eiga við rök að styðjast.

Þetta kemur fram í tilkynningu frá Bergþóru Halldórsdóttur, yfirlögfræðingi Borealis.

Borealis er stórtækt fyrirtæki á sviði gagnavera en félagið rekur gagnaver við Blönduós og stendur auk þess í umtalsverðri uppbyggingu á svæðinu.

Kröfur Borealis talsvert hærri

Aðalmeðferð hófst í málinu í dag í Héraðsdómi Reykjavíkur en félagið sem stefnir Borealis heitir Adomat & Heidenblut M 1 ehf. Samkvæmt stefnunni skuldar Borealis félaginu vegna vangoldinna leigugreiðslna fyrir tölvubúnað sem Borealis er með í vörslum sínum.

„Borealis á verulegar kröfur á hendur þeim félögum sem standa að baki málshöfðuninni vegna ógreiddrar þjónustu og eru þær kröfur talsvert hærri en þær kröfur sem Adomat & Heidenblut M 1 ehf. telur sig kunna að eiga á hendur Borealis, séu þær einhverjar,“ segir í tilkynningunni.

Bergþóra segir búnaðinn vera í vörslu Borealis vegna ógreiddra skulda Adomat og sé það í samræmi við skilmála í samningi þeirra á milli.

„Við teljum þær ásakanir sem koma fram í fréttatilkynningu félagsins Adomat & Heidenblut M 1 ehf. ekki eiga við rök að styðjast og tilgangur hennar sé að reyna að valda félaginu áframhaldandi tjóni.“

Mun ekki hafa áhrif á Borealis

Eins og áður segir hófst aðalmeðferð í málinu í dag og er niðurstöðu að vænta á næstu vikum.

„Niðurstaða málsins mun ekki hafa áhrif á rekstur Borealis eða áform þess um áframhaldandi uppbyggingu.“

Bæði Skatturinn og KPMG Law hafa gert kröfu um að bú Adomat & Heidenblut M 1 verði tekið til gjaldþrotaskipta. Gjaldþrotakrafan verður tekin fyrir í Héraðsdómi Reykjavíkur í næsta mánuði.

内容来自 mbl.is - Viðskiptafréttir,版权归原作者所有。

阅读原文 ↗

把喜欢的内容,留在你的新标签页。

打开我的订阅