Þrívíddarprentuð vopn áhyggjuefni í Svíþjóð
Þrívíddarprentað vopn sem sænska lögreglan lagði hald á í Landskrona-málinu í fyrra. Ári síðar prenta menn út hríðskotabyssur og panta íhlutina á Alibaba. Ljósmynd/Sænska lögreglan
Nýjar útgáfur af hálfsjálfvirkum þrívíddarprentuðum vopnum hafa skotið upp kollinum á sænska markaðnum og er þarlend lögregla uggandi yfir þróuninni.
Teikningum af vopnum þessum er nú dreift um almenninga lýðnetsins ásamt myndbandsleiðbeiningum og upplýsingum um hvar hægt sé að kaupa aukahluti í þau.
Sú var tíðin að þrívíddarprentuð vopn voru einföld og einnota, þau þurfti að endurhlaða eftir hvert skot, sjálfvirkni eða hálfsjálfvirkni var ekki til að dreifa. Í ofanálag gátu þau sprungið fyrirvaralaust og stórskaðað væntanlega notendur fremur en skotmörk þeirra.
En þá var öldin önnur er Gaukur bjó á Stöng og nú hafa nýjar gerðir litið dagsins ljós, meðal annars FGC-9, hálfsjálfvirkt vopn með skothylki sem getur hleypt af mörgum skotum í röð án þess að eyða þurfi tíma í að hlaða vopnið handvirkt eftir hvert skot.
155 útprentuð skotvopn haldlögð
Eftir því sem sænska lögreglan greinir frá hefur hún nú lagt hald á 155 þrívíddarprentuð vopn frá árinu 2022 að telja og af þeim eru 54 af gerðinni FGC-9. Þá eru ótaldir þeir vopnahlutar sem lagt hefur verið hald á að auki.
Í leiðbeiningunum á netinu má finna tengla er vísa á íhluti sem hægt er að kaupa af kínverskum vefsíðum, þar á meðal Alibaba sem er Evrópubúum kunnur verslunarvettvangur fyrir öllu hættuminna glingur.
Hefur sænska ríkisútvarpið SVT hefur leitað viðbragða hjá Alibaba með tölvupósti en ekki fengið þaðan svör.
内容来自 Mbl.is - Erlendar fréttir,版权归原作者所有。
阅读原文 ↗