Gæti tekið langan tíma að lagfæra Krímskagabrúna
Það gæti tekið Rússa þó nokkra mánuði og allt að eitt ár að fjarlægja hluta Krímskagabrúarinnar sem hrundu eftir árásir Úkraínumanna og ollu miklum skemmdum á brúnni.
Þetta sagði Jevhenij Khmara, varnarmálaráðherra Úkraínu, á fundi Volodimírs Selenskís Úkraínuforseta og Wes Streeting, varnarmálaráðherra Bretlands, að því er Kyiv Independent greindi frá.
Úkraínumenn gerðu umfangsmikla árás á brúna, sem tengir Rússland við hernumda Krímskagann, 17. nóvember. Hluti akbrautarinnar hrundi og skipaumferð um Kerch-sund fór úr skorðum. Brúin er mikilvæg birgðaleið fyrir rússneskar hersveitir á hernumdum svæðum Úkraínu.
Á fundinum lýsti Selenskí árásinni sem flókinni aðgerð í mörgum áföngum, sem fól einnig í sér að eyða rússneskum vopnum sem beitt hefur verið gegn Úkraínu.
Réttlætti árásirnar
Selenskí réttlætti ítrekaðar árásir Úkraínumanna á Krímskagabrúna og kallaði þær „sanngjörn viðbrögð“ við 109 aðskildum árásum Rússa á brýr í Úkraínu.
Í samtali við BBC í Kænugarði sagði Selenskí að hinar hörðu árásir Rússa á Úkraínu sem fylgt hafa í kjölfar árásanna á Krímskagabrúna væru aðeins „merki um að Vladimír Pútín vilji ekki hætta. Hann leitar að tilefni til að stigmagna átökin“.
Selenskí hafnaði fullyrðingu Rússlandsforseta um að brúin, sem tengir Rússland við skagann sem það innlimaði ólöglega frá Úkraínu, væri „eingöngu“ notuð í borgaralegum tilgangi.
„Það liggja fyrir staðreyndir, ekki bara orð Pútíns. Við sjáum það,“ sagði hann.
Úkraínuforsetinn benti á myndir á netinu af skriðdrekum og öðrum rússneskum hergögnum sem nota leiðina frá Rússlandi inn á Krímskaga sem birgðaleið og til flutninga.
„Ef Pútín myndi nota netið gæti hann séð það.“
Selenskí bætti við að Rússar hefðu gert árásir með eldflaugum og drónum á brýr í Úkraínu.
Sameiginlegar eldflauga- og drónaárásir úkraínskra hersveita í síðustu viku eyðilögðu miðhluta akbrautar Krímskagabrúarinnar, þannig að hluti hennar ásamt öðrum af tveimur burðarbogunum hrundi í sjóinn þannig að öll bílaumferð var ómöguleg.
内容来自 Mbl.is - Helstu fréttir,版权归原作者所有。
阅读原文 ↗


