Fyrrverandi lögreglustjóri fannst látinn á Ítalíu

Saksóknarar í Caltanissetta á Sikiley hófu í síðustu viku rannsókn á því hvort De Gennaro hefði torveldað rannsókn á sprengjuárásinni í Palermo 19. júlí 1992. Ljósmynd/Colourbox

Gianni De Gennaro, fyrrverandi yfirmaður ítölsku ríkislögreglunnar, fannst látinn á heimili sínu í Toskana í morgun.

Ítalskir fjölmiðlar segja að hann sé talinn hafa svipt sig lífi. De Gennaro sætti rannsókn vegna gruns um að hafa torveldað rannsókn á morðinu á dómaranum Paolo Borsellino árið 1992.

De Gennaro var 78 ára. Hann er talinn hafa skotið sig á heimili sínu. Að sögn ítalska dagblaðsins La Repubblica gerðu ættingjar hans yfirvöldum viðvart þegar þeir náðu ekki sambandi við hann í gærkvöldi. Hann fannst látinn í dögun.

Dagbók dómarans hvarf eftir árásina

Saksóknarar í Caltanissetta á Sikiley hófu í síðustu viku rannsókn á því hvort De Gennaro hefði torveldað rannsókn á sprengjuárásinni í Palermo 19. júlí 1992. Borsellino, sem var þekktur fyrir baráttu sína gegn mafíunni, lést í árásinni ásamt fimm lífvörðum sínum.

Saksóknarar telja að sönnunargögnum hafi verið haldið leyndum við rannsókn árásarinnar. Rannsókn þeirra hefur einkum beinst að hvarfi dagbókar Borsellinos, sem hafði að geyma minnispunkta um mál sem hann rannsakaði. Dagbókin er sögð hafa horfið skömmu eftir sprenginguna.

Á síðustu dögum fyrirskipuðu saksóknarar leit á heimili De Gennaros og fóru fram á að hann yrði settur í stofufangelsi. Dómari sem hafði umsjón með frumrannsókn málsins hafnaði beiðninni. Til stóð að taka fyrir kæru vegna þeirrar ákvörðunar 1. desember.

Tveir dómarar myrtir á innan við tveimur mánuðum

Morðið á Borsellino var framið tæpum tveimur mánuðum eftir aðra alræmda árás mafíunnar. Hinn 23. maí 1992 var 53 ára dómarinn Giovanni Falcone myrtur í sprengjuárás við Capaci skammt frá Palermo. Eiginkona hans og þrír lífverðir létust einnig. Hálft tonn af sprengiefni hafði verið grafið undir veginum. Falcone hafði, líkt og Borsellino, barist gegn mafíunni.

Eftir morðið á Borsellino hertu ítölsk yfirvöld baráttuna gegn sikileysku mafíunni, Cosa Nostra. Í janúar 1993 handtók lögregla Totò Riina, leiðtoga samtakanna, sem gekk undir viðurnefninu „Skepnan“.

Margir þeirra sem báru ábyrgð á árásunum voru síðar sakfelldir. Enn er þó spurningum ósvarað í máli Borsellinos, einkum um hvað varð um dagbók hans.

Giorgia Meloni, forsætisráðherra Ítalíu, sagði fregnirnar af andláti De Gennaros hafa komið sér í mikið uppnám. Hún vottaði bróður hans, yfirmanni ítölsku fjármálalögreglunnar, og öðrum ástvinum hans samúð sína.

内容来自 Mbl.is - Erlendar fréttir,版权归原作者所有。

阅读原文 ↗

用 HomepageTab 新标签页关注 RSS,打开浏览器就能看到更新。

安装 HomepageTab