Fær ekki 7,1 milljón í viðbótarvexti af skaðabótum

Maðurinn gekkst undir liðskiptaaðgerð á Landspítala í janúar 2015. Hann fékk alvarlegar sýkingar í kjölfarið og þurfti að gangast undir fjölmargar aðgerðir og endurhæfingu. Ljósmynd/Colourbox

Héraðsdómur Reykjavíkur hefur sýknað íslenska ríkið af kröfu manns um 7,1 milljón króna í viðbótarvexti af skaðabótum vegna tafa á greiningu eftir liðskiptaaðgerð á Landspítala.

Maðurinn og ríkið höfðu áður samið um uppgjör upp á rúmar 77 milljónir króna, þar af um átta milljónir í vexti.

Héraðsdómur taldi að vextir sem féllu á kröfuna meira en fjórum árum fyrir uppgjörið væru fyrndir. Fyrra dómsmál mannsins, sem lauk með því að ríkið viðurkenndi bótaskyldu í réttarsátt, sleit ekki fyrningu vaxtakröfunnar.

Fékk alvarlegar sýkingar eftir aðgerð

Maðurinn gekkst undir liðskiptaaðgerð á Landspítala í janúar 2015. Hann fékk alvarlegar sýkingar í kjölfarið og þurfti að gangast undir fjölmargar aðgerðir og endurhæfingu.

Sjúkratryggingar Íslands ákvörðuðu honum rúmar 11,1 milljón króna í bætur úr sjúklingatryggingu árið 2019.

Árið 2022 höfðaði maðurinn mál gegn ríkinu til að fá bótaskyldu þess viðurkennda. Því lauk með réttarsátt í nóvember 2024. Þar viðurkenndi ríkið bótaskyldu vegna tjóns sem kynni að hafa hlotist af töfum á greiningu eða mistökum við meðferð í kjölfar aðgerðarinnar.

Matsmenn töldu að læknum og öðrum meðferðaraðilum hefði í síðasta lagi 12. september 2016 átt að vera ljóst hversu alvarlegir fylgikvillarnir voru og að grípa hefði átt til tafarlausra aðgerða. Heilsufar mannsins var talið orðið stöðugt í júní 2023. Varanleg örorka hans var metin 60% og varanlegur miski 42 stig.

Samdi um uppgjör með fyrirvara

Maðurinn og ríkið sömdu um uppgjör 7. nóvember 2025. Fjárhæðin tók til bóta vegna tímabundins atvinnutjóns, þjáninga, varanlegs miska og varanlegrar örorku, auk vaxta og kostnaðar. Ríkið taldi vexti sem höfðu fallið á fyrir 7. nóvember 2021 fyrnda og miðaði uppgjör þeirra við það. Maðurinn gerði meðal annars fyrirvara um frekari vaxtakröfur.

Hann krafðist þess í nýja málinu að fá 7,1 milljón króna til viðbótar, auk dráttarvaxta. Hann vildi að vextir af bótum fyrir tímabundið atvinnutjón, þjáningar og varanlegan miska yrðu reiknaðir frá tjónsdegi í september 2016. Hann taldi fyrningarfrestinn þó í fyrsta lagi hafa getað hafist þegar heilsufar hans var talið orðið stöðugt árið 2023.

Til vara krafðist hann tæplega 5,1 milljónar króna auk dráttarvaxta. Sú krafa miðaðist við að fyrra dómsmálið hefði slitið fyrningunni árið 2022 og að því mætti reikna vextina fjögur ár aftur frá þeirri málshöfðun.

Fyrra málið tók ekki til vaxtakröfunnar

Héraðsdómur taldi að vextirnir fyrntust sjálfstætt á fjórum árum eftir því sem þeir féllu á kröfuna. Fyrningarfrestur vaxta af bótum fyrir tímabundið atvinnutjón, þjáningar og varanlegan miska réðst því af því hvenær vextirnir féllu á, óháð því hvenær heilsufar mannsins varð stöðugt.

Dómurinn taldi fyrri málshöfðunina ekki hafa slitið fyrningunni þar sem þá var krafist viðurkenningar á bótaskyldu og vaxtakrafan sjálf var ekki til úrlausnar. Dómurinn féllst heldur ekki á að birting stefnunnar hjá embætti ríkislögmanns hefði slitið fyrningunni. Embættið annast uppgjör bótakrafna á hendur ríkinu en hefur ekki vald til að ákveða hvort ríkið viðurkennir bótaskyldu í einstökum málum.

Niðurstaðan var því að vextir sem féllu á fyrir 7. nóvember 2021 væru fyrndir. Dómurinn féll 17. nóvember og málskostnaður milli aðila féll niður.

内容来自 Mbl.is,版权归原作者所有。

阅读原文 ↗

用 HomepageTab 新标签页关注 RSS,打开浏览器就能看到更新。

安装 HomepageTab