Pawel óhræddur við uppsagnir til að ná núllinu
Pawel Bartoszek, formaður þingflokks Viðreisnar, setur sig ekki upp á móti því að opinberum starfsmönnum verði sagt upp ef til þess þarf að koma svo fjárlög næsta árs verði hallalaus. Hann segir að ríkisstjórnin muni standa við markmið sitt um núll króna halla og að leita eigi leiða til að draga úr útgjöldum ríkisins.
„En það þýðir að þið þurfið að segja upp fólki?“ spyr Stefán Einar Stefánsson í Spursmálum.
„Það er ekki vandamál hvað mig varðar, þó það sé erfitt að gera það,“ svarar Pawel. Hann segir að aðgerðir á útgjaldahlið séu að hans mati vænlegri til að ná markmiðinu en frekari tekjuöflun. Í viðtalinu kemur fram afstaða hans til uppsagna sem hugsanlegrar sparnaðarleiðar. Þar nefnir hann engar tilteknar stofnanir eða störf.
Núllið „tússað á blaðið“
Tilefni umræðunnar er ný spá Seðlabankans um minni hagvöxt en áður var gert ráð fyrir og horfur á að tekjur ríkissjóðs verði lægri en fjárlagafrumvarpið gerir ráð fyrir. Hildur Sverrisdóttir, þingmaður Sjálfstæðisflokksins, segir að stjórnvöld hafi hrósað sigri um leið og núllið var „tússað á blaðið“ í haust. Þá þegar hafi verið ástæða til að efast um að dæmið gengi upp.
Hildur segir að Þorgerður Katrín Gunnarsdóttir, formaður Viðreisnar, hafi ítrekað verið spurð á Alþingi hvernig ríkisstjórnin hyggðist brúa bilið ef tekjur yrðu minni en áætlað var. Hildur segist enn bíða svars við því hvaða aðgerðir séu í vændum og spyr hvort búast megi við frekari skattahækkunum.
Hún gagnrýnir sérstaklega þær hækkanir sem þegar hafa verið boðaðar og snerta ferðaþjónustuna. Að hennar mati skortir mat á því hvaða áhrif þær hafi á greinina og hvort afleidd áhrif geti orðið til þess að minna skili sér í ríkissjóð en stjórnvöld reikna með.
Segir hagræðingu skila tveimur af hverjum þremur krónum
„Núllið mun halda,“ segir Pawel. Spurður hvort ríkisstjórnin grípi til frekari skattahækkana til að ná því markmiði svarar hann því til að það verði ekki gert.
Pawel segir að um tveir þriðju hlutar þess sem þegar hefur verið gert til að ná fjárlögunum saman komi frá hagræðingu. Þar nefnir hann fækkun hjá hinu opinbera og að fallið sé frá ýmsum endurgreiðslum. Hann segir tekjuaukningu einnig eiga þátt í jöfnuðinum og bendir þar á innviðagjöld og hækkun skatta á baðlón. Þegar hann er spurður hvernig eigi að bregðast við lakari tekjuhorfum vísar hann aftur til útgjaldanna.
Hildur segir að árið 2025 hefði orðið hallalaust ef ríkisstjórnin hefði haldið sig við fjárlögin sem sett voru í tíð starfsstjórnarinnar árið 2024. Pawel svarar því til að fjármálaáætlun fyrri stjórnar hafi gert ráð fyrir að jöfnuði yrði náð seinna en núverandi ríkisstjórn stefnir að.
Þegar Pawel hefur svarað spurningunni um uppsagnir stingur Hildur upp á að hann ræði við félaga sína í Reykjavíkurborg, sem virðist hafa „sterk bein til þess“. Pawel tekur undir að meirihlutinn í borginni, sem Viðreisn skipar ásamt Sjálfstæðisflokki og Framsókn, hafi tekist á við erfiðar ákvarðanir. Stundum þurfi stjórnmálamenn, segir hann, að mæta fyrir framan fólkið sem ákvarðanirnar snerta og segja því hvernig málum verði háttað.
Viðtalið við Pawel og Hildi má nálgast í heild sinni í spilaranum hér að neðan:
内容来自 Mbl.is - Innlendar fréttir,版权归原作者所有。
阅读原文 ↗