Hefur bara selt fimm eintök af GTA

Í hulstrinu er ekki diskur heldur aðeins kóði. Það heillar notendur ekki. AFP/Michael M. Santiago

Eigandi tölvuleikjaverslunar í Leicester á Englandi segist aðeins hafa selt fimm eintök af stórleiknum Grand Theft Auto 6, þrátt fyrir gríðarlega eftirvæntingu eftir útgáfu hans. Ástæðan sé sú að leikurinn kom eingöngu út á stafrænu formi.

GTA 6 kom út á fimmtudag eftir 13 ára bið. Leikurinn hefur þegar slegið met, en á fyrsta sólarhringnum hefur hann selst í 24,5 milljónum eintaka. 

Richard Tewksbury, eigandi verslunarinnar Super Game Shack, segir söluna hins vegar hafa valdið miklum vonbrigðum.

„Fólk er gríðarlega spennt fyrir þessum leik og salan er þegar komin á fullt, en það hefur ekki skilað sér til okkar,“ segir hann við BBC.

Alls hefur hann selt fjögur eintök fyrir PlayStation 5 og eitt fyrir Xbox.

Enginn vill kóða í kassa

Leikjaframleiðandinn Rockstar Games ákvað að gefa leikinn ekki út á hefðbundnum diskum. Þess í stað innihalda eintök sem seld eru í verslunum aðeins kóða til að hlaða leiknum niður.

Tewksbury segir að fáir hafi áhuga á slíku fyrirkomulagi og að ákvörðunin hafi komið illa niður á minni verslunum.

Hann telur jafnframt að stafrænar útgáfur verði sífellt algengari. Sony hefur þegar tilkynnt að PlayStation-leikir verði ekki lengur gefnir út á diskum frá janúar 2028.

Óttast lokun fleiri verslana

Ákvörðunin hefur einnig vakið óánægju meðal tölvuleikjaáhugamanna.

Rob Spence, sem safnar tölvuleikjum á áþreifanlegu formi, segir mikilvægt að geta haldið á leikjunum og safnað þeim í hillur.

Hann óttast að þróunin leiði til þess að fleiri sjálfstæðar tölvuleikjaverslanir loki á næstu árum.

Að hans mati snúist málið ekki eingöngu um sölu tölvuleikja heldur einnig um samfélagið sem myndast í kringum verslanirnar.

Hann bendir á að útgáfukvöld, þegar áhugamenn komu saman til að kaupa nýjustu leikina á miðnætti, gætu brátt heyrt sögunni til.

内容来自 mbl.is - Tækni og Vísindi,版权归原作者所有。

阅读原文 ↗

用 HomepageTab 新标签页关注 RSS,打开浏览器就能看到更新。

安装 HomepageTab