Jamie Oliver: Nautalund í parmaskinku með rauðvínssósu

Jamie Oliver færir nautalundina í hátíðarbúning með kóngssveppum og parmaskinku. Uppskriftin er úr bók hans Jamie’s Friday Night Feast, sem kom út árið 2018. Samsett mynd/Skjáskot Instagram

Nautalund, kóngssveppir og parmaskinka eru uppistaðan í þessum fallega rétti frá Jamie Oliver. Sveppirnir fá að malla með hvítlauk og smjöri áður en þeim er vafið utan um kjötið ásamt þunnum skinkusneiðum. Rósmarín og timían fylgja lundinni í ofninn og úr steikingarsafanum er gerð rauðvínssósa.

Parmaskinkan gegnir hér stærra hlutverki en að prýða lundina. Þunnar sneiðarnar mynda hjúp utan um kjötið sem ver það við eldun og gefur því um leið saltbragð. Innan undir skinkunni liggur blanda af kóngssveppum, hvítlauk og smjöri sem gerir hverja sneið enn bragðmeiri. Þetta er því skemmtileg leið til að færa nautalundina í hátíðarbúning án þess að fela hráefnið á bak við flókna matreiðslu.

Oliver mælir með kartöflu- og hnúðsellerímauki og gufusoðnu grænu grænmeti með réttinum.

Nautalund í parmaskinku með rauðvínssósu

  • 1 kg nautalund, miðjustykki, hreinsuð
  • 20 g þurrkaðir kóngssveppir, porcini
  • 300 ml nýsoðið vatn
  • 1 stór heill hvítlaukur
  • 50 g ósaltað smjör
  • ½ sítróna
  • 1 msk. ólífuolía
  • 10 stórar, þunnar sneiðar af prosciutto eða parmaskinku
  • 4 greinar ferskt rósmarín
  • 4 greinar ferskt tímarit
  • 250 ml rauðvín
  • Sjávarsalt og svartur pipar
  • Smjörklípa til viðbótar í sósuna, ef vill

Aðferð

  1. Hitið ofninn í 220 °C. Takið nautalundina úr kæli áður en hafist er handa við undirbúninginn.
  2. Setjið kóngssveppina í skál, hellið 300 ml af nýsoðnu vatni yfir og látið liggja í fimm mínútur.
  3. Afhýðið og saxið tvo hvítlauksgeira smátt. Hitið stóra pönnu við háan hita og setjið hvítlaukinn á hana ásamt klípu af smjörinu. Bætið sveppunum og helmingnum af bleytivatninu út í. Gætið þess að botnfall úr skálinni fylgi ekki með. Lækkið hitann og látið malla í um fimm mínútur, eða þar til vökvinn hefur soðið niður og blandan þykknað.
  4. Kreistið safann úr hálfri sítrónu saman við og hrærið afganginum af smjörinu út í. Smakkið til með sjávarsalti og svörtum pipar. Látið kólna lítillega.
  5. Dreypið ólífuolíunni yfir nautalundina og kryddið með svörtum pipar. Brúnið hana á öllum hliðum við meðalhita í steikingarfati sem þolir bæði helluhita og ofn. Takið fatið af hellunni.
  6. Leggið skinkusneiðarnar á stóra örk af bökunarpappír og látið þær skarast örlítið. Þær eiga að mynda nægilega stóran flöt til að hægt sé að vefja þeim utan um lundina.
  7. Dreifið sveppablöndunni eftir endilöngum öðrum helmingi skinkuflatarins og leggið nautalundina ofan á. Notið pappírinn til að hjálpa til við að rúlla skinkunni utan um kjötið. Brjótið endana inn, fjarlægið bökunarpappírinn og bindið utan um lundina með eldhúsgarni.
  8. Losið afganginn af hvítlauksgeirunum í sundur og kremjið þá létt með hýðinu á. Setjið þá í steikingarfatið ásamt rósmaríni og timíani og leggið lundina varlega ofan á.
  9. Eldið í ofninum í um 25 mínútur fyrir lítið steikt kjöt, 30–35 mínútur fyrir meðalsteikt eða um 40 mínútur fyrir gegnsteikt. Tímarnir eru viðmið; þykkt og upphafshiti kjötsins hafa áhrif á eldunina og því er gott að fylgjast með henni með kjöthitamæli.
  10. Færið kjötið yfir á skurðarbretti og látið hvíla í fimm mínútur. Látið safann sem rennur úr því fara aftur í steikingarfatið.
  11. Setjið fatið á hellu við meðalháan hita. Hellið rauðvíninu og afganginum af bleytivatni sveppanna út í og skiljið botnfallið eftir í skálinni. Látið sjóða niður þar til sósan hefur náð þeirri þykkt sem óskað er eftir. Skafið steikingarleifarnar af botni fatsins og hrærið saman við.
  12. Takið fatið af hitanum og sigtið sósuna ef vill. Hrærið smjörklípu saman við í lokin fyrir mýkri áferð.
  13. Fjarlægið eldhúsgarnið, skerið lundina í sneiðar og berið fram með rauðvínssósunni.

Uppskrift: Jamie Oliver / Jamie’s Friday Night Feast Cookbook. Upprunalega uppskriftin.

内容来自 Mbl.is - Matur,版权归原作者所有。

阅读原文 ↗

把喜欢的内容,留在你的新标签页。

打开我的订阅