Hægt hefur á kínverska markaðnum
Sverrir Haraldsson, yfirmaður erlendrar starfsemi Vinnslustöðvarinnar, fylgist með Þorgerði Katrínu Gunnarsdóttur utanríkisráðherra taka í hendina á Hiroki Igarashi, sem starfar við sölu- og markaðsmál hjá Vinnslustöðinni. Ljósmynd/VSV
Fulltrúar Vinnslustöðvarinnar í Vestmannaeyjum hittu kaupendur og kynntu afurðir fyrirtækisins á sjávarútvegssýningunni China Fisheries & Seafood Expo í Qingdao í Kína í vikunni.
Á vef fyrirtækisins kemur fram að horfur fyrir komandi loðnuvertíð hafi verið ofarlega á baugi, en einnig hafi gefist tækifæri til að ræða stöðu markaða og ný viðskiptatækifæri.
„Vinnslustöðin var með bás á sýningunni líkt og undanfarin ár. Hún er haldin árlega í Qingdao og er ein stærsta sýning sinnar tegundar í heiminum,“ segir á vef VSV.
Fulltrúar VSV á sýningunni voru Sverrir Haraldsson, yfirmaður erlendrar starfsemi, Yohei Kitayama, sölustjóri í Japan, og Hiroki Igarashi, sem starfar við sölu- og markaðsmál hjá Vinnslustöðinni í Vestmannaeyjum.
Efnahagsþróun og hátt verð hafa áhrif
Haft er eftir Yohei Kitayama að hægt hafi á kínverska markaðnum eftir mikinn vöxt undanfarinna ára. Þess hafi meðal annars gætt í aðsókn kínverskra kaupenda á sýninguna.
„Við finnum fyrir minni kaupgetu fyrirtækja í Kína og minni eftirspurn. Kínverskum kaupendum á sýningunni hefur líka fækkað,“ segir Yohei.
Hann telur skýringuna helst liggja í efnahagsþróuninni en hátt verð á fiskafurðum hafi einnig áhrif.
„Kaupendur kvarta yfir háu verði og lélegri afkomu. Fiskafurðir hafa hækkað mikið í verði um allan heim og það virðist koma sérlega illa við kaupendur í Kína,“ segir hann.
内容来自 Mbl.is - 200 mílur,版权归原作者所有。
阅读原文 ↗