Það allra heitasta í vetur

Isabel Marant, Chanel, Chloé og Miu Miu.

Isabel Marant, Chanel, Chloé og Miu Miu. Samsett mynd

Hausttískan er mætt í allri sinni dýrð. Það sem er það besta við þennan tíma er að fötin eru í senn praktísk og falleg. Það er örlítil nostalgía í loftinu, töffaraskapur en einnig fínlegheit og ríkuleg efni í kvöldfatnaði.

Satín og kögur

Kvöldfatnaðurinn horfir til Art Deco-tímabilsins með nútímalegri nálgun. Þetta eru kvöldjakkar og kápur úr dýrðlegu flaueli, satín og fínlegt kögur og flíkur skreyttar steinum. Þetta sást vel hjá franska hátískuhúsinu Chanel þar sem blúndu, satíni og steinum var blandað saman í haust- og vetrarlínunni.

Haust- og vetrarlína franska tískuhússins Chanel.

Haust- og vetrarlína franska tískuhússins Chanel. Ljósmynd/Chanel

Velúrtoppur frá Aftur sem kostar 42.700 kr.

Velúrtoppur frá Aftur sem kostar 42.700 kr.

Chiffon-toppur með steinum og kögri frá Gimaguas og fæst í Andrá. Toppurinn kostar 43.990 kr.

Alvöru ullarpeysa

Ein af þessum flíkum sem við verðum að eiga þegar kuldinn nálgast. Kasmírpeysur í gráum og brúnum tónum verða áberandi í vetur, sérstaklega stuttar með stórum rúllukraga.

Ullarpeysa með köðlum í dökkgráum lit með háum kraga. Fæst í Hjá Hrafnhildi og kostar 36.980 kr.

Belti með sylgju

Nú gætu einhverjir andvarpað og hugsað, eru þessi belti komin aftur? Svarið er já. Stórar sylgjur á leðurbeltum, paraðar við buxur sem eru lágar í mittið, stuttermabol eða satínskyrtu. Áður en þú fjárfestir í slíku belti skaltu athuga hvort þú finnir ekki svipað hjá nákomnum ættingja.

Leðurbelti með sylgjum frá Ralph Lauren, fæst í Mathildu og kostar 99.990 kr.

Hár kragi

Jakkar með háum kraga hafa verið áberandi síðustu misseri, bæði í einhvers konar íþróttaefni, þykkri bómull og nú leðri. Leðurjakki í þessum stíl er það sem þú ættir að vera að fjárfesta í núna og notaðu hann við allt í fataskápnum.

Leðurjakki með háum kraga frá Mango og kostar 31.999 kr. samkvæmt vefsíðu Mango.

Allt svo áreynslulaust

Franska tískuhúsið Isabel Marant er hvað þekktast fyrir að ná fram þessum ekta og áreynslulausa töffarastíl. Það tókst heldur betur fyrir haustið og á tískusýningunni voru eldrauðar gallabuxur stíliseraðar með sebrastígvélum og gallajakka. Eins og þú hafir klætt þig á fimm mínútum og henst út. Það þarf ekki að hugsa allt út í gegn.

Isabel Marant haust- og vetrarlína.

Isabel Marant haust- og vetrarlína. Ljósmynd/Isabel Marant

Rúskinnsstígvél

Það eru líkur á að einhverjir hafi fjárfest í svona stígvélum í fyrra, sem eru góðar fréttir, því þau munu enn vera í tísku í vetur. Notaðu þau við pils eða víðar buxur.

Stígvél frá Isabel Marant, fást í Mathildu og kosta 119.990 kr.

Hnésíð pils

Síðustu árstíðir hafa stuttbuxur ráðið ríkjum en nú taka kvenlegu pilsin við. Pils geturðu sett saman við þunnar prjónapeysur fyrir dagsdaglega notkun eða satínskyrtu þegar þú ert að fara eitthvað fínna. Þetta verður mest notaða flíkin í vetur.

Hnésítt pils og skyrta í stíl frá Miu Miu.

Hnésítt pils og skyrta í stíl frá Miu Miu. Ljósmynd/Miu Miu

Vinnubuxur

Við erum ekki alveg að tala um Snickers-buxurnar, en nálægt því þó. Vinnubuxurnar lyfta heildarútlitinu aðeins upp og gera þig að meiri töffara. Þetta eru buxur úr bómullar- eða gallaefni og eru með stærri vösum á hliðunum. Ótal margar eru hræddar við þessar buxur en það er um að gera að máta.

Vinnubuxur frá Zöru í dökkgrænum lit sem kosta 11.995 kr.

Vinnubuxur frá Zöru í dökkgrænum lit sem kosta 11.995 kr.

Síðar loðnar kápur

Þessi tíska hentar Íslandi vel. Finndu hlýlegustu og mýkstu gerviloðkápuna og hún verður besti vinur þinn í vetur. Þessi flík er ekki aðeins til að nota fínt heldur bara hvenær sem er, bæði í erindisleysu og erindagjörðir um allan bæ. Aukastig fyrir hatt í stíl.

Haust- og vetrarlína Chloé.

Haust- og vetrarlína Chloé. Ljósmynd/Chloé

Inniskórnir

Þægindin geta alveg verið í fyrirrúmi í vetur því flatir inniskór, úr leðri, skreyttir eða loðnir, hafa verið áberandi hjá tískuhúsunum. Þessa er ekki hægt að nota í versta veðrinu en þá má hafa í skópoka og taka með í vinnu. En passaðu að þetta séu ekki Birkenstock-sandalarnir, heldur skór sem eitthvað er áhugavert við.

Haustlína Conner Ives.

Haustlína Conner Ives. Ljósmynd/Conner Ives

内容来自 Mbl.is - Tíska,版权归原作者所有。

阅读原文 ↗

把喜欢的内容,留在你的新标签页。

打开我的订阅