„Innsæi mitt var búið að segja að það væri maður á leiðinni“
Jón Gnarr sendi Jógu fjölmörg SMS-skilaboð til þess að reyna að bjóða henni á stefnumót. Ljósmynd/Aðsend
Jóga Gnarr var ekkert að leita sér að kærasta þegar Jón Gnarr kom inn í líf hennar. Hún segist þó hafa fundið á sér að maður væri á leiðinni og hún var byrjuð að undirbúa komu hans. Jón þurfti hins vegar að sýna nokkra þolinmæði í upphafi sambandsins því Jóga kunni ekki að svara SMS-skilaboðunum sem hann sendi henni. Þetta kemur fram í hlaðvarpinu Marta María býður heim.
Jóga Gnarr hefur alla tíð lifað ævintýralegu lífi og segir að henni líði best þegar nóg er um að vera. Þegar hún kynntist Jóni Gnarr hafði hún lengi verið ein með syni sínum, Frosta, og var ekkert sérstaklega að svipast um eftir ástarsambandi.
Hún segist þó hafa verið sannfærð um að breytingar væru framundan.
„Nei, ég var bara ekki að leita mér að manni en innsæi mitt var búið að segja að það væri maður á leiðinni,“ segir Jóga.
Hún tók þessa tilfinningu svo alvarlega að hún ákvað að breyta ýmsu í daglegu lífi sínu til að skapa pláss fyrir væntanlegan kærasta.
Lokaði kaffihúsinu heima hjá sér
Á þessum tíma var heimili Jógu eins konar félagsmiðstöð fyrir vini hennar, listamenn og tónlistarfólk. Gestagangurinn var mikill og fólk kom reglulega í kaffi, spjall og skemmtilegar samverustundir.
Jóga áttaði sig hins vegar á því að ef nýr maður ætti að koma inn í líf hennar þyrfti hún að setja ákveðin mörk.
„Ég vissi að ég yrði að fara að setja mörk, passa að þegar maðurinn kæmi þá yrði pláss fyrir hann,“ segir hún.
Hún tilkynnti því vinum sínum að nú væri þessu tímabili lokið og að kaffihúsinu á heimili hennar yrði lokað.
Viðbrögðin urðu þó ekki alveg eins og hún hafði búist við.
Fljótlega fór af stað kjaftasaga um að Jóga væri orðin þunglynd.
Til að leiðrétta misskilninginn ákvað hún að bjóða vinunum aftur í kaffi og sagðist vera að fara að skrifa bók.
Það var þó ekki alveg sannleikanum samkvæmt.
„Sem var haugalygi,“ segir Jóga hlæjandi.
Hún segist hins vegar hafa réttlætt þetta fyrir sjálfri sér með því að hún væri vissulega að skrifa sína eigin lífssögu, hvort sem hún kæmi einhvern tíma út á prenti eða ekki.
Jón sendi skilaboð en fékk ekkert svar
Á sama tíma var Jón Gnarr farinn að sýna Jógu áhuga. Hann bauð henni út að borða og í bíó, en það gekk ekki alveg þrautalaust að koma á samskiptum þeirra.
Ástæðan var einföld: Jóga kunni ekki að svara SMS-skilaboðum.
„Það leið svolítill tími af því ég kunni ekki að svara SMS-um,“ segir hún.
Hún átti svokallaðan samlokusíma sem Björk Guðmundsdóttir hafði gefið henni. Síminn var lítið notaður og Björk var ein þeirra fáu sem hringdu í hana.
„Annars var ég bara með heimasíma,“ segir Jóga.
Jón hafði sent henni nokkur skilaboð án þess að fá svar og þegar hann loks náði sambandi spurði hann hvort það væri ekki komið að því að hann fengi að bjóða henni út að borða.
„Og ég sló til. Það var ekki aftur snúið,“ segir hún.
„Við erum sálarfélagar“
Jóga segir að hún og Jón hafi strax fundið sterka tengingu. Hún lýsir þeim sem sálufélögum og segir að þau deili sömu sýn á lífið, ekki síst mikilvægi húmorsins.
„Við erum sálarfélagar,“ segir hún.
Þegar Marta María bendir á að Jón sé eiginlega heill sirkus út af fyrir sig tekur Jóga undir það.
„Bæði sirkus,“ segir hún um þau hjónin.
Hún segir að hlutverkin í sambandi þeirra séu fjölbreytt. Stundum þurfi hún að vera sirkusstjórinn sem haldi utan um hlutina, stundum ljónatemjarinn og stundum trúðurinn.
Jón geti sömuleiðis brugðið sér í ólík hlutverk og það sé einmitt hluti af því sem geri samband þeirra skemmtilegt.
Fimm börn undir sama þaki
Kynni þeirra Jóns breyttu lífi Jógu á fleiri en einn hátt.
Hún hafði áður búið með Frosta syni sínum en Jóni fylgdu þrjú börn. Þegar þau hófu sambúð varð því til stór fjölskylda.
Jóga telur að þau hafi byrjað að búa saman um átta mánuðum til ári eftir að þau kynntust.
Hún var þá búin að eignast rúmgóða íbúð í Vesturbænum þar sem fjölskyldan kom sér fyrir.
Síðar eignuðust þau soninn Nonna saman. Jóga var 44 ára þegar hann fæddist og segir skemmtilega tilviljun að bæði móðir Jóns og amma hans hafi einnig eignast börn 44 ára.
„Þannig að ég gekk einhvern veginn inn í þessa bylgju og eignast Nonna 44 ára,“ segir hún.
Þótt Jóga hafi ekki kunnað að svara fyrstu skilaboðunum frá honum reyndist ákvörðunin um að fara með honum út að borða upphafið að nýjum kafla í lífi hennar.
Hægt er að hlusta á viðtalið við Jógu Gnarr í hlaðvarpinu Marta María býður heim og á hlaðvarpsvef mbl.is.
内容来自 Mbl.is - Smartland - Frægð,版权归原作者所有。
阅读原文 ↗