Guðrún Íslandsmeistari í fimmta sinn
Guðrún Brá Björgvinsdóttir, kylfingur úr Golfklúbbnum Keili, varð í dag Íslandsmeistari í golfi annað árið í röð. Hún lék hringina fjóra á einu höggi undir pari.
Þetta er fimmti Íslandsmeistaratitill Guðrúnar á ferlinum og fer hún þar með fram úr föður sínum, Björgvini Sigurbergssyni, sem varð Íslandsmeistari fjórum sinnum á ferlinum.
Fyrir lokahringinn var Guðrún í góðri stöðu á einu höggi undir pari með þriggja högga forskot á Elsu Marenu Steinarsdóttur úr Golfklúbbnum Leyni.
Mikil spenna var eftir fyrri níu holurnar í dag. Guðrún fékk tvo skolla og einn örn og var því aðeins einu höggi á undan Ragnhildi Kristinsdóttur sem fékk þrjá fugla.
Hins vegar náði Ragnhildur ekki að setja meiri pressu á Guðrúnu og fékk þrjá skolla og einn tvöfaldan skolla á seinni níu. Guðrún fékk fugl og skolla og endaði því hringinn á pari.
Elsa Maren endaði í öðru sæti en hún lék lokahringinn á tveimur höggum yfir pari og lauk mótinu á fjórum höggum yfir pari. Ragnhildur hafnaði í þriðja sæti á sex höggum yfir pari.
内容来自 Mbl.is - Íþróttir - Golf,版权归原作者所有。
阅读原文 ↗
