Anthropic metið á 187 billjónir króna
Gert er ráð fyrir að viðskipti með bréf félagsins hefjist á Nasdaq á morgun undir auðkenninu ANT. AFP
Mikil eftirspurn er eftir hlutabréfum í gervigreindarfyrirtækinu Anthropic. Útboðsverðið var ákveðið í dag, 83 Bandaríkjadalir á hlut, eða um 10.370 krónur, samkvæmt bandarískum fjölmiðlum. Það er fimm dölum yfir efri mörkum verðbilsins sem félagið gaf upp í síðustu viku.
Miðað við 825 milljónir hluta í bráðabirgðaútboðslýsingu félagsins næmi heildarsöluverð í útboðinu um 68,5 milljörðum dala, eða um 8.560 milljörðum króna.
Hluti bréfanna er í eigu núverandi hluthafa og rennur andvirði þeirra til seljendanna. Reuters hefur eftir heimildarmanni að umfang útboðsins hafi verið aukið.
Útboðsverðið svarar til um 1,5 billjóna dala verðmats á Anthropic, eða um 187 billjóna króna, að teknu tilliti til kaupréttar starfsmanna og hlutabréfa sem bundin eru takmörkunum.
Gert er ráð fyrir að viðskipti með bréf félagsins hefjist á Nasdaq á morgun undir auðkenninu ANT. Skráningin gefur almennum fjárfestum í fyrsta sinn færi á að kaupa beint hlut í stóru, sjálfstæðu fyrirtæki sem sérhæfir sig í þróun háþróaðra gervigreindarlíkana.
Eftirspurn nær áttföld á við upphaflegt framboð
Anthropic hafði gefið upp verðbil frá 70 til 78 dölum á hlut, eða um 8.740 til 9.740 krónur. Samkvæmt CNBC bárust óbindandi kauptilboð frá fagfjárfestum upp á um 400 milljarða dala og frá almennum fjárfestum upp á um 100 milljarða dala, jafnvirði um 50 þúsund milljarða og 12.500 milljarða króna.
Miðað við efri mörk upphaflega verðbilsins og fjölda hluta í bráðabirgðalýsingunni var eftirspurnin því nær áttföld á við framboðið.
Eftirspurnin var mikil þrátt fyrir sveiflur í verði hlutabréfa gervigreindarfyrirtækja. Fjárfestar hafa velt því fyrir sér hvort umfangsmiklar fjárfestingar í tækninni muni skila sér.
Fyrri áætlanir gerðu ráð fyrir að verðmat Anthropic gæti orðið allt að tvær billjónir dala, eða um 250 billjónir króna. Þær lækkuðu eftir að verð á hlutabréfum í geiranum féll á Wall Street á síðustu vikum.
内容来自 mbl.is - Viðskiptafréttir,版权归原作者所有。
阅读原文 ↗