Senda ekki lengur Hopper-örgjörva til Kína
Tæknirisinn Nvidia hefur ákveðið að hætta að senda gervigreindarörgjörva úr „Hopper“-línu sinni til Kína.
Háþróaðir örgjörvar frá Nvidia eru fremsti vélbúnaður heims þegar kemur að því að þjálfa og keyra gervigreindartól, sem gerir þá að afar viðkvæmum búnaði í tæknikapphlaupinu milli Bandaríkjanna og Kína.
Ábatasöm sala á örgjörvum Nvidia og ásakanir um að þeim sé smyglað til Kína hafa verið í umræðunni eftir að Jensen Huang, fyrrverandi forstjóri fyrirtækisins, átti í ástarsambandi við konu sem hefur verið grunuð um njósnir fyrir Peking.
Á þriðja ársfjórðungi „nam sala á leyfisskyldum Hopper-gagnaversvörum til Kína 2,4 milljörðum dala,“ sagði Colette Kress, starfandi forstjóri, á afkomufundi í gær.
En „í horfum okkar eru engar leyfisskyldar Hopper-gagnaversvörur, og við erum hætt að senda leyfisskyldar Hopper-gagnaversvörur til Kína.“
Kress gaf ekki upp ástæðu fyrir ákvörðuninni.
Dilin Wu, rannsóknarsérfræðingur hjá Pepperstone, sagði við AFP að „tímasetningin segi heilmikið“.
„Við vitum ekki nákvæmlega hvað varð til þess að ákveðið var að stöðva sendingarnar, en það lítur svo sannarlega út fyrir að Nvidia sé að reyna að draga skýrari mörk í kringum starfsemi sína í Kína og fullvissa eftirlitsaðila um að regluvarsla sé í fyrirrúmi.“
Á þessu ári ákvað ríkisstjórn Trumps að heimila takmarkaða sölu á örgjörvanum H200 úr Hopper-línu Nvidia til Kína.
Skilyrði Bandaríkjanna hafa þó gert erfitt fyrir að fá sendingar samþykktar, auk þess sem Kínverjar eru taldir tregir til að kaupa H200-örgjörva á meðan innlendur örgjörvaiðnaður landsins sækir í sig veðrið.
内容来自 mbl.is - Tækni og Vísindi,版权归原作者所有。
阅读原文 ↗
