Andrea kynntist þakkargjörðarhátíðinni í Bandaríkjunum

Andrea Gunnarsdóttir kynntist þakkargjörðarhátíðinni þegar hún bjó í Bandaríkjunum og hefur haldið í hefðina síðan. Snickers-salatið er meðal þess sem hún ber fram með kalkúninum. Samsett mynd/Aðsend

Þakkargjörðarhátíðin verður haldin í Bandaríkjunum fimmtudaginn 26. nóvember, í næstu viku. Af því tilefni rifjar Andrea Gunnarsdóttir upp góða uppskrift að kalkúnaveislu þar sem beikon, döðlur og sveppasósa koma við sögu. Punkturinn yfir i-ið er stór saltkaramellusmákaka með þrenns konar súkkulaði.

Andrea kynntist hátíðinni þegar hún bjó í Bandaríkjunum og hefur haldið í hefðina eftir heimkomuna. Hún birtir uppskriftirnar á vef sínum og lýsti því hvernig heill dagur í eldhúsinu hefði skilað sér í eftirminnilegri máltíð.

„Máltíðin var gjörsamlega dásamleg og við vorum afvelta eftir matinn,“ skrifaði Andrea.

Þakkargjörðarhátíðin verður haldin í Bandaríkjunum fimmtudaginn 26. nóvember, í næstu viku. Ljósmynd/Aðsend

Hún bar kalkúninn fram með sveppasósu, sætkartöflumús með pekanhnetukrönsi, Snickers-salati, smjörsoðnum maískornum og fyllingu með beikoni og döðlum.

Beikonklætt kalkúnaskip

Kalkúnabringan er krydduð og þakin beikonsneiðum áður en hún fer í ofninn. Ljósmynd/Aðsend

  • 1 kalkúnaskip, stærð eftir fjölda matargesta
  • 300 g beikon í sneiðum
  • Best á kalkúninn kryddblanda

Aðferð:

  1. Hitið ofninn í 180 °C.
  2. Klæðið bökunarplötu með álpappír eða bökunarpappír og komið kalkúnaskipinu fyrir á henni.
  3. Nuddið kryddblöndunni vel yfir kalkúnaskipið og þekið það með beikonsneiðum þannig að hvergi sjáist í kjötið.
  4. Eldið í um 2–3 klukkustundir, eftir stærð kalkúnaskipsins. Andrea miðaði við um 2½ klukkustund fyrir 3 kg kalkúnaskip.
  5. Notið kjöthitamæli til að meta hvort kjötið sé tilbúið. Kjarnhiti í þykkasta hluta bringunnar á að ná að minnsta kosti 74°C. Mælirinn má ekki snerta bein. 

Fylling með beikoni og döðlum

Það er ómissandi að hafa fyllingu með beikoni og döðlum.

Það er ómissandi að hafa fyllingu með beikoni og döðlum. Ljósmynd/Aðsend

  • 15 franskbrauðsneiðar, skornar í teninga
  • 200 g beikon, skorið í strimla
  • 2 laukar, skornir í þunnar sneiðar
  • smjör til steikingar
  • 10 döðlur, saxaðar smátt
  • 1 msk. kalkúnakraftur
  • 1½ tsk. Best á kalkúninn kryddblanda
  • 2 msk. kalkúnakrydd
  • ½ tsk. hvítur pipar
  • salt og pipar eftir smekk
  • 2 egg, léttþeytt
  • 2½ dl nautasoð úr fernu

Aðferð

  1. Steikið beikonið á pönnu þar til það er orðið stökkt. Takið það af pönnunni og setjið til hliðar.
  2. Bræðið smjör á pönnunni og steikið laukinn í um 8 mínútur.
  3. Bætið döðlum, kalkúnakrafti og kryddi saman við og blandið vel.
  4. Setjið brauðteningana og beikonið á pönnuna. Blandið saman og steikið í 3–4 mínútur.
  5. Bætið eggjunum og nautasoðinu saman við og blandið vel. Færið í eldfast mót.
  6. Þegar kalkúnninn er tilbúinn er fyllingin sett í ofninn og bökuð í um 20–30 mínútur, þar til hún er elduð í gegn. 

Villisveppasósa

Góð sósa skiptir miklu máli í þessari veislu.

Góð sósa skiptir miklu máli í þessari veislu. Ljósmynd/Aðsend

  • 5 skalottlaukar, saxaðir smátt
  • 250 g sveppir, sneiddir
  • 1 bréf sveppasósa
  • villisveppaostur, rifinn
  • 2½ dl nautasoð
  • 4 dl rjómi
  • 1 sveppateningur
  • 1 nautateningur
  • 3 msk. rifsberjahlaup
  • hvítur pipar eftir smekk
  • 1½ tsk. kalkúnakrydd
  • smjör til steikingar

Aðferð

  1. Bræðið smjör í potti. Þegar það er farið að freyða er skalottlauknum og sveppunum bætt út í. Steikið í um 8 mínútur.
  2. Bætið sósuduftinu og rifnum villisveppaostinum saman við.
  3. Hellið nautasoðinu út í í mjórri bunu og hrærið vel á meðan.
  4. Bætið rjómanum, sveppateningnum og nautateningnum saman við og látið suðuna koma upp.
  5. Hrærið rifsberjahlaupinu og kryddblöndunni saman við. Smakkið til með hvítum pipar.
  6. Látið sósuna malla við vægan hita í um 5 mínútur áður en hún er borin fram.

Snickers-salat með rauðum eplum

Í salatinu mætast rauð epli, Snickers og mjúk rjómablanda með vanillubragði. Andrea hefur meðal annars borið það fram með kalkún, hamborgarhrygg og lambalæri. Ljósmynd/Aðsend

  • 6 rauð epli, skorin í teninga
  • 6 Snickers-stykki, skorin í teninga
  • 1 pakki af vanillubúðingsdufti
  • 2 dl rjómi
  • 2½ dl nýmjólk
  • 3 msk. majónes

Aðferð

  1. Þeytið vanillubúðingsduftið og nýmjólkina saman í skál. Setjið í kæli í 10–15 mínútur.
  2. Þeytið rjómann.
  3. Skerið eplin og Snickers-stykkin í teninga.
  4. Hrærið majónesinu saman við vanillubúðinginn þar til blandan er kekkjalaus.
  5. Blandið þeytta rjómanum varlega saman við búðingsblönduna.
  6. Blandið eplunum og Snickers-bitunum varlega saman við með sleif.
  7. Geymið salatið í kæli þar til það er borið fram.

Sætkartöflustappa með pekanhnetukrönsi

Mjúk sætkartöflustappa með stökku pekanhnetulagi er meðal þess sem Andrea ber fram með kalkúninum. Uppskriftina sækir hún á vef Svövu, Ljúfmeti.

  • 3 stórar sætar kartöflur
  • 100 g hrásykur
  • 2 egg
  • 75 g mjúkt smjör
  • 1 dl mjólk
  • ½–1 tsk. vanilludropar

Pekanhnetukröns

  • 200 g púðursykur
  • 100 g pekanhnetur, saxaðar
  • 40 g hveiti
  • 75 g brætt smjör

Aðferð

  1. Hitið ofninn í 175 °C og smyrjið eldfast mót.
  2. Sjóðið sætu kartöflurnar þar til þær eru mjúkar í gegn. Fjarlægið hýðið og skerið kartöflurnar í bita.
  3. Setjið kartöflurnar í skál ásamt hrásykri, eggjum, mjúku smjöri, mjólk og vanilludropum. Stappið vel saman og færið yfir í eldfasta mótið.
  4. Blandið púðursykri, söxuðum pekanhnetum og hveiti saman í annarri skál.
  5. Hellið brædda smjörinu saman við hnetublönduna og hrærið með skeið.
  6. Dreifið pekanhnetublöndunni jafnt yfir stöppuna.
  7. Bakið í um 30 mínútur.

Saltkaramellusmákaka með súkkulaðibitum

Eftirrétturinn er bakaður í steypujárnspönnu og má undirbúa með fyrirvara. Andrea bendir á að hægt sé að geyma óbakaða kökuna í kæli fram að bakstri. Ljósmynd/Aðsend

  • 225 g smjör við stofuhita
  • 2 egg
  • 1 eggjarauða
  • 220 g púðursykur
  • 220 g sykur
  • 3 tsk. vanillusykur
  • 1 tsk. matarsódi
  • ½ tsk. mulið sjávarsalt, eða eftir smekk, og meira til að strá yfir
  • 340 g hveiti
  • 1 pakki af saltkaramellubúðingsdufti 
  • 150 g suðusúkkulaðidropar
  • 150 g rjómasúkkulaðidropar
  • 75 g hvítir súkkulaðidropar

Aðferð

  1. Hitið ofninn í 180 °C. Smyrjið 24 cm steypujárnspönnu með smjöri eða bökunarúða.
  2. Þeytið smjörið, púðursykurinn og sykurinn saman þar til blandan er ljós og létt.
  3. Bætið eggjunum, eggjarauðunni, vanillusykrinum, saltinu og matarsódanum saman við og þeytið áfram.
  4. Blandið saltkaramellubúðingsduftinu saman við.
  5. Bætið hveitinu út í og blandið saman. Hrærið að lokum súkkulaðidropunum saman við deigið.
  6. Þrýstið deiginu jafnt í pönnuna og stráið sjávarsalti yfir eftir smekk.
  7. Bakið í 30–35 mínútur. Látið kökuna kólna í 10–15 mínútur áður en hún er borin fram.

内容来自 Mbl.is - Matur,版权归原作者所有。

阅读原文 ↗

用 HomepageTab 新标签页关注 RSS,打开浏览器就能看到更新。

安装 HomepageTab